Feijóo: "Algúns partidos se atopan inmersos nun bucle autorreferencial"
O presidente do PPdeG, Núñez Feijóo, participou hoxe, en
Barcelona, nunha reunión preparatoria da ponencia económica e territorial de
cara ao vindeiro Congreso Nacional do Partido Popular, que se celebrará na
primeira metade do mes de febreiro. Na súa intervención aberta, o líder dos
populares galegos reivindicou ao seu partido como representante da “boa
política”, aquela que serve para construír un país “con vimbios para crecer e
no que os cidadáns poidan vivir cada vez mellor”.
Feijóo ve na actualidade que algúns partidos se atopan inmersos nun
“bucle autorreferencial”, no que esquecen falar das necesidades dos cidadáns
para centrarse nas súas liortas internas, e entende que esta é unha das causas
de que España veña de vivir dez meses nunha situación de bloqueo institucional.
Para facerlle fronte a isto, o PP elabora as súas ponencias para “afrontar con
valentía a busca de solucións aos problemas reais do país”. Deste xeito,
subliñou que “a clave para mellorar o Estado autonómico é superar a política
egocéntrica para centrármonos na política útil”.
“Por riba de calquera carné, nós dicimos que
militamos en Galicia”, destacou o presidente, e engadiu que “iso implica ser
tamén militantes da España autonómica”. Neste sentido, volveu reivindicar a
necesidade de estabilidade política e económica como ferramenta clave para
crecer.
Así, enumerou como ingredientes imprescindibles para que os cidadáns
desenvolvan o seu proxecto vital: un entorno político sen grandes vaivéns, un
marco xurídico fiable e consolidado, e un contexto económico que reduza a
incerteza. Con estas liñas mestras, Feijóo ponderou que “España non é aínda o
país que desexamos, pero xera cada vez máis oportunidades para máis persoas”,
xa que lidera o crecemento en Europa e conseguiu saír da crise con reformas
estruturais que melloraron o seu prestixio internacional.
Responsabildade e crecemento
Se a estabilidade
é un dos cernes do bo funcionamento das institucións, outro é a responsabilidade
na xestión, como vía para lograr un proxecto de país sólido no que a meirande
parte de cidadáns se sintan recoñecidos. Sobre este punto, Feijóo afondou na
necesidade dunha lexislación laboral que combine flexibilidade e seguridade,
nas garantías do sistema de pensións e nunha fiscalidade que reforce o Estado
do Benestar sen lastrar a actividade económica como piares de calquera acción
de Goberno que se queira chamar responsable.
Incidindo nesta
idea, Feijóo apuntou como un dos debates clave de futuro a reformulación do
modelo de financiamento autonómico, pero advertiu que “non se poden mesturar
dous debates, como o identitario e o do financiamento”, argumentando que “isto
non pode reducirse a unha discusión sobre bandeiras, sentimentos e emocións”.
O presidente
instou aos políticos de todo signo a “seguir avanzando unidos”, de cara a
perfeccionar a estrutura da España das autonomías. Para isto, a súa aposta pasa
porque se garantan fontes de ingresos estables para manter os servizos públicos
que sufragan, se establezan canles de diálogo en pé de igualdade entre as
distintas comunidades, e que se aborde cunha perspectiva de conxunto o reto
demográfico para facer viables tanto as pensións coma a Sanidade.
“Se
afrontamos esta ilusionante época de reformas coa cabeza posta no progreso de
España e o benestar dos cidadáns, seguiremos sendo vistos como dignos
representantes da mellor política, a política útil” destacou no peche da súa
intervención. Departamento de comunicación