A SECRETARÍA XERAL DE CULTURA
Difunde o calendario do libro e da lectura 2017
O centenario do pasamento de Eduardo Pondal, o
120º aniversario do nacemento de Eduardo Blanco Amor, os 100 anos da
publicación da obra ‘Da terra asoballada’, de Ramón Cabanillas, os días da
Ilustración, da Poesía, do Libro Infantil e Xuvenil, das Letras Galegas
–dedicado a Carlos Casares–, da Edición e da Biblioteca son algunhas das datas
máis significativas e efemérides do Calendario do Libro e da Lectura 2017, que
a Secretaría Xeral de Cultura acaba de distribuír nas librarías e nos
principais centros da Rede de Bibliotecas Públicas de Galicia.
Elaborado anualmente en cumprimento do Lei 17/2006, do 27 de decembro,
do libro e a lectura de Galicia, o calendario de 2017 abre o ano coa
celebración do Día do Usuario/a das Bibliotecas, o 11 de xaneiro, nun mes no
que tamén se cumpren o 115º aniversario do nacemento de Plácido Castro (25 de
xaneiro) e o 150º aniversario do nacemento de Manuel Portela Valladares (31 de
xaneiro). Coincidindo coa data doutro nacemento, o de Castelao, Galicia celebra
o 30 de xaneiro o Día da Ilustración, arredor do que as bibliotecas de xestión
autonómica están a preparar un completo programa de actividades para todos os
públicos durante as primeiras semanas do próximo ano.
Datas para Pondal, Blanco
Amor e María Mariño
Outros acontecementos destacados vinculados con persoeiros ilustres das
letras e da cultura galegas que se inclúen no cartel son o pasamento de Eduardo
Pondal, do que se cumpren 100 anos o día 8 de marzo; o falecemento da escritora
María Mariño, acontecido hai medio século (o 19 de maio), o centenario do
pasamento de Fanny Garrido (11 de setembro), o 120º aniversario do nacemento de
Eduardo Blanco Amor (14 de setembro), o 180º aniversario do nacemento do
escritor e historiador Antón López Ferreiro (9 de novembro) e mais o 75º
aniversario do pasamento do debuxante e escritor Cándido Fernández Mazas (15 de
novembro).
Celebracións
nos meses dos libros e das letras
O mes das letras está dedicado en 2017 a
Carlos Casares, autor homenaxeado co 17 de maio. Xunto co Día das Letras
Galegas, o calendario difunde outras datas significativas arredor do libro e da
lectura. No mes de marzo celébranse os días da Narración Oral (8), da Poesía
(21) e do Teatro (27), mentres que abril ten como protagonistas o Día do Libro
Infantil e Xuvenil (2) e o Día do Libro (23). Xa nos últimos meses do ano
destacan o Día da Biblioteca (24 de outubro), o Día das Librarías (10 de
novembro) e o Día da Edición (17 de decembro), que coincide co aniversario do
nacemento de Ánxel Casal.
O Día da Lingua Materna (21 de febreiro), a
Semana da Prensa (6 de marzo), o Día das Artes Galegas, que este ano se lle
dedica a Maruja Mallo (1 de abril), o Día dos Arquivos (9 de xuño), o Día da
Comprensión Lectora (26 de xullo), o Día Europeo das Linguas (26 de setembro) e
o Día da Tradución (30 de setembro) completan o Calendario do Libro e da Lectura
2017.
Promover
o libro e fomentar a lectura
O departamento da Consellería de Cultura e Educación
edita e difunde este recurso co que facilita a planificación anual de
actividades arredor das principais datas vinculadas co libro e mais coa
lectura, cos obxectivos de fomentar a lectura e de reforzar o interese da
cidadanía polas letras e pola cultura galegas.