Román Rodríguez asistiu ao festival infantil de curtas "Pequefilmes"
O conselleiro de Cultura, Educación e
Ordenación Universitaria, Román Rodríguez; e a directora xerente da Cidade da
Cultura, Ana Isabel Vázquez; asistiron hoxe á primeira edición do festival
infantil de curtas ‘Pequefilmes’, unha cita que sinalou como unha oportunidade
para apoiar a importante tarefa de inculcar aos máis novos a cultura
audiovisual. Non en balde, o público obxectivo deste festival foron rapaces de
entre 5 e 12 anos, que puideron gozar durante o sábado e a mañá do domingo de
52 proxeccións diferentes, que se ofreceron de balde no Museo Centro Gaiás, na
Cidade da Cultura de Galicia. Ademais, os asistentes puideron participar en obradoiros
formativos para descubrir o funcionamento do cine de animación.
Cómpre salientar a calidade das curtametraxes,
entre elas 4 de orixe galego, que amosan a creatividade do noso audiovisual;
fitas avaladas polos premios recibidos e nominacións a galardóns do máximo
prestixio. Co obxectivo de promover o gusto polo audiovisual dos rapaces e
favorecer a súa reflexión, os asistentes puideron valorar e puntuar as pezas.
‘Pequefilmes’ abre ademais na Cidade da
Cultura un novo espazo para a exhibición de curtametraxes, no marco da estratexia
desenvolvida pola Consellería para achegar ao conxunto da cidadanía ao complexo
do Gaiás, ampliando os seus usos culturais e de ocio.
Curtas
internacionais con múltiples recoñecementos
O festival estruturouse en dúas franxas de
idade: de 5 a 8 anos e de 9 a 12 anos, co obxectivo de que cada grupo de
público teña unha proposta axeitada a súa idade, intereses e gustos. As curtas
seleccionadas ofreceronn unha pluralidade de temas, puntos de vista e
historias, incidindo en numerosos aspectos sociais e éticos sen perder de vista
nunca o divertimento.
Procedentes de todas as partes do mundo, o
cartel deste mini-festival contou con curtas recoñecidas nos máis prestixiosos
festivais como a noruega ‘Me and my Moulton’, nominada aos Oscar 2015; ‘Juan y
la Nube’, Goya á Mellor Curta Animada; ‘The empty’, Gran Premio en Hiroshima e
Seúl; ‘Trial & Error’, Platinum Remi Award no World Fest de Houston; ou
‘Pawo’, Mellor Película Infantil en Brasilia Animation
Festival 2015. Ademais, o festival contará con varias curtas realizadas e
producidas en Galicia.