O Club de Prensa convida á reflexión sobre a imaxe da muller na prensa e na publicidade

O Club Internacional de Prensa convida á reflexión sobre a imaxe da muller nos medios de comunicación e na publicidade con motivo do Día da Muller Traballadora en dous actos organizados para a ocasión. O mércores terá lugar ás 18 horas na Facultade de Ciencias da Comunicación unha mesa-debate sobre "A muller nos medios de comunicación", mentres que o xoves, ás 19.30 horas, a Fundación Caixa Galicia de Santiago acolle unha conferencia da directiva do Club de Creativos de España, Eva Conesa. A vicedecana da Facultade de Ciencias Sociais da Universidade de Vigo, Mónica Valderrama; a socióloga e profesora da Universidade da Coruña, Carmen Lamela; a xornalista e escritora asturiana Isabel Menéndez, e a recén licenciada en Xornalismo, Susana Pombo, analizarán dende distintas ópticas o papel da muller nos medios, tanto no eido laboral como na proxección social. Baixo o título "Publicidade: feminino, e en singular", a directiva do Club de Creativos de España, Eva Conesa, abordará o xoves o papel da muller no eido publicitario, tanto como "obxecto" como no seu labor creativo no sector.