En marcha a iniciativa "Usa a auga con cabeza"

A Consellería de Medio Ambiente e Ordenación do Territorio, a través de Augas de Galicia, vén poñer en marcha unha iniciativa para fomentar o uso responsable deste recurso. ‘Usa a auga con cabeza’ vén a poñer de manifesto que aínda que os galegos estamos afeitos a vivir nunha terra de auga e a pensar que a seca non é unha situación que se poida dar nesta comunidade, debemos ser conscientes de que en Galicia a auga é unha imprescindible fonte de vida.

Trátase dunha campaña de concienciación para pensar que aínda que esta nunca será unha terra de seca é moi posible que no futuro vexamos consecuencias pola falta de auga, sobre todo se non se fai un uso responsable da mesma.   

Con esta iniciativa presentase unha esaxeración para chamar a atención sobre unha situación que, sen ser propia da comunidade dos mil ríos, podería chegar a selo se non tomamos medidas e se non facemos un uso responsable da auga. (Ao final de nota axúntanse creatividades da iniciativa ‘Usa a auga con cabeza’).   

Cómpre lembrar que Augas de Galicia tomou a decisión de activar a situación de prealerta por posibilidade de seca hidrolóxica en toda a Demarcación Galicia Costa o pasado 12 de xaneiro. Esta decisión, ratificada a semana pasada na reunión de seguimento da Oficina Técnica da Seca, adoptouse logo de comprobar o baixo caudal que corre polos ríos respecto do que sería esperable nesta época do ano.  

A pesares da situación, o abastecemento de auga á poboación está garantido, xa que son suficientes para garantir as demandas de abastecemento dos núcleos que captan directamente deles e carecen de encoros reguladores. Por outra banda, os niveis que presentan os encoros da Demarcación Galicia Costa, aínda que algo inferiores a outros anos, están dentro da normalidade.