Feijóo: "Estamos abertos ao diálogo e aos acordos con todos os grupos desta Cámara"
O presidente da Xunta, Núñez Feijóo, expresou
hoxe, no Pleno da Cámara galega, a vontade negociadora do Executivo autonómico para,
ao abeiro da Conferencia de Presidentes, designar o experto que represente Galicia
no debate dun novo modelo de financiamento así como para elaborar unha Lei de
impulso demográfico. “Estamos abertos ao diálogo e aos acordos cos grupos desta
Cámara”, dixo, incidindo en que para desenvolver os asuntos acordados na conferencia
do pasado martes sería moi interesante contar cun amplo apoio por parte do
Parlamento autonómico.
A tal fin, Feijóo avanzou que, no eido do
financiamento, o conselleiro de Facenda se poñerá en contacto nos vindeiros
días cos grupos parlamentarios para establecer un diálogo acerca do nome do
experto máis adecuado para acometer esta tarefa. “A nosa vontade é lograr que a
elección da persoa que desde a Xunta se proporá en menos dun mes para formar
parte da comisión de expertos, teña o máis amplo apoio desta Cámara”, aseverou,
ao que engadiu que sería unha boa maneira de comezar a perfilar unha postura
reforzada de país no proceso de negociación dun novo sistema de financiamento.
En relación co reto demográfico, o responsable
autonómico afirmou que segue en pé a oferta que el mesmo formulou a finais do
mes pasado: a disposición de modificar o decreto que regula a composición do
Observatorio Galego de Dinamización Demográfica; un organismo que terá como
principal cometido acadar un pacto político, social e económico que se traduza
nunha lei galega de impulso demográfico co maior consenso posible.
Feijóo lembrou que neste observatorio xa están a
Fegamp, os sindicatos, os empresarios, as universidades e expertos na materia,
“e agora trátase de adaptalo para que se poidan incorporar os representantes
dos grupos parlamentarios”, aseverou, subliñando que “sería bo que as propostas
que poidamos pactar neste órgano fosen as que levásemos á estratexia nacional que
os presidentes autonómicos acordamos ter aprobada neste 2017”.
Así mesmo, referiuse tamén ao acordo acadado o
pasado martes para consolidar a Conferencia de Presidentes como un instrumento
útil. Ao respecto, asegurou que o Goberno galego asume o compromiso de
información e transparencia: “e sempre que se produza unha xuntanza desta
conferencia –que segundo o fixado debe ter carácter anual- , o presidente da
Xunta haberá de comparecer na Cámara para informar do seu alcance e contido; e
cando se celebre unha reunión do comité de seguimento para avaliar o estado dos
acordos –xuntanza de carácter semestral-, o vicepresidente tamén comparecerá no
Parlamento para manter informados os grupos dos avances que se vaian
rexistrando”.
A estes tres compromisos, Feijóo engadiu un
adicional en relación ao acordo referido á violencia de xénero. Sobre este
punto, avogou por aproveitar o debate que esta tarde terá lugar no Parlamento
sobre unha emenda do Grupo Popular á moción do BNG sobre esta materia, “para
elevar unha postura única e conxunta de todos os grupos á xuntanza da Comisión
Xeral de Comunidades do Senado e que se acordou convocar tras a Conferencia de
Presidentes”.
Actitude
vixiante e esixente para que os acordos acadados na Conferencia se cumpran
Durante a súa intervención para trasladar aos grupos
parlamentarios o contido, desenvolvemento e resultados da VI Conferencia de Presidentes,
Feijóo afirmou que para que este primeiro paso non sexa o último, o Goberno
galego manterá unha actitude vixiante e esixente para que os acordos acadados
se cumpran; e unha vontade negociadora co Goberno central, co resto das
comunidades e cos grupos da Cámara para buscar o mellor para Galicia e para os
galegos. “Porque os acordos acadados, e os que se poidan derivar máis adiante,
serán froito das achegas de todos os que queiran participar, e pensados para o
benestar e prosperidade de todos os españois, vivan onde vivan”, sentenciou.
O presidente da Xunta aproveitou o Pleno para
explicar novamente polo miúdo os acordos acadados, e que teñen unha
transcendencia especial para o exercicio do noso autogoberno e para ofrecer uns
mellores servizos aos cidadáns. “Falamos de financiamento autonómico, de
financiar a atención á dependencia e de analizar o impacto do gasto sanitario;
de como ir cara a un modelo educativo pactado, duradeiro e eficaz; de máis
oportunidades para o emprego; de como mellorar as relacións coa Unión Europea;
da crise dos refuxiados; da violencia de xénero; de como axudar ás familias con
menos recursos no acceso á electricidade ou a través da tarxeta social; e dun
tema clave para garantir o noso futuro como é a evolución demográfica”, explicou
a modo de resumo.