CONSELLOS PRÁCTICOS
A Xunta publica un manual para o aforro enerxético
A Consellería de Economía, Emprego e Industria vén de publicar na páxina
web do Instituto Enerxético de Galicia (Inega)
un manual de boas prácticas para impulsar o aforro nos fogares galegos, mellorar
o aproveitamento dos recursos enerxéticos e fomentar o uso de enerxías
renovables, autóctonas e limpas como a biomasa.
A nova guía publicada polo Inega recolle consellos prácticos para as
familias galegas, que representan o 30% do consumo final de enerxía en Galicia.
O manual recomenda a utilización de lámpadas cunha eficacia luminosa alta, pois
son máis eficientes, así como a instalación de detectores de presenza en
lugares de paso, portais e xardíns. En canto o uso da calefacción, o Inega
aconsella programar termóstatos para acender e apagar, regulando a temperatura:
17ºC durante a noite e 20ºC polo día. Ademais, a limpeza periódica da caldeira
e o queimador por parte dun profesional supón un aforro do 5%.
Para o emprego de auga quente, entre outras recomendacións, o Inega
recorda que ducharse en vez de bañarse supón, ademais dun aforro enerxético, un
aforro de auga medio de 80 litros; e aposta pola utilización de enerxía solar
térmica para reducir o consumo enerxético nun 70%. En canto aos
electrodomésticos, é preciso esixir o etiquetado enerxético e comprobar os
consumos medios do aparato e a súa clasificación de eficiencia: por exemplo, un
frigorífico de clase A++ consome 450kWh menos ao ano que un de clase
D, é dicir, un aforro medio de 65 euros ao ano. Tamén aconsella non introducir
alimentos quentes no frigorífico ou empregar programas económicos nas lavadoras
e nos lavalouzas.
Na cociña, o Inega indica neste manual que se pode aforrar ata un 20% de
enerxía usando recipientes cun fondo maior que o lume e tapando sempre as potas;
sendo a ola a presión a máis rápida, eficiente e aforradora.
Para os desprazamentos, entre os consellos prácticos que recolle a guía,
destaca o uso do transporte público e, no caso de moverse en vehículo
particular, circular na marcha máis longa que permitan as condicións de tráfico
para baixar as revolucións, controlar con frecuencia a presión dos pneumáticos
e o seu debuxo, ou arrancar o motor sen pisar o acelerador.
Observatorio da
Biomasa
O Inega tamén puxo en marcha o Observatorio da Biomasa, un portal web (www.observatoriobiomasa.gal) no
que se realiza un seguimento da actividade dos axentes que forman parte deste
sector en Galicia co obxectivo principal de impulsar o seu desenvolvemento e
modernización con fins enerxéticos.
Enmarcado dentro da Estratexia
Galega de Impulso á Biomasa, coa que se pretende a substitución de fontes de calor
baseadas en combustibles fósiles por esta enerxía renovable de orixe forestal, o Observatorio concíbese como un
foro de encontro permanente, no que o sector, desde o punto de vista
empresarial, tecnolóxico e laboral, identifica as súas fortalezas para
desenvolver medidas eficaces para a mellora da súa competitividade e, por
extensión, para a mellora do tecido industrial de Galicia.
Así, as
principais funcións do Observatorio son o rexistro, localización e datos de
contacto de fabricantes e distribuidores de pellets, achas e caldeiras,
instaladores e mesmo instalacións existentes xa en funcionamento; o seguimento
de prezos de combustibles e caldeiras; servir de soporte documental de informes
técnicos e de difusión (proxectos, resultados, tecnoloxía e xornadas); ofrecer
información actualizada sobre liñas de axuda no ámbito da biomasa; e amosar
experiencias sobre instalacións de esta fonte de enerxía renovable para que os
usuarios poidan buscar o equipamento desexado en función do sector
(residencial, industrial ou público).
Ademais, a
nova web conta cun simulador que permite coñecer os investimentos
necesarios para substituír instalacións consumidoras de electricidade, gasóleo,
fuelóleo, glp ou gas natural por biomasa; facilitando tamén os aforros
económicos e enerxéticos potenciais da substitución e o seu período de retorno.
O emprego da biomasa contribúe a aforrar custos, fixar emprego no rural
e impulsar a defensa do medio ambiente, ao tempo que, a nivel industrial, axuda
a mellorar a competitividade das empresas.