Portos de Galicia impulsará as mariñas tradicionais nos peiraos

Portos de Galicia impulsará a creación de mariñas tradicionais nos peiraos autonómicos nos que estas instalacións teñan cabida respectando o planeamento urbanístico e o desenvolvemento da normal actividade portuaria. Deste xeito, o organismo portuario pretende compatibilizar o seu apoio ás iniciativas favorables á posta en valor das embarcacións tradicionais coa garantía de plena operatividade dos espazos portuarios.   

Ante o interese amosado por parte de diferentes entidades e asociacións que procuran a habilitación de espazos para atraque de embarcacións tradicionais e singulares, Portos de Galicia poñerá en valor o patrimonio marítimo portuario a través da habilitación destas mariñas tradicionais, entre outras iniciativas.   

Neste sentido, Portos de Galicia ten informado tamén aos impulsores destas propostas, da necesidade de que estas instalacións sexan compatibles coa ordenación do  solo portuario e a lámina de auga, así como co normal desenvolvemento das actividades económicas que se realizan diariamente nos peiraos autonómicos.   

Así, promoveranse os proxectos que se adapten á Delimitación de Espazos e Usos Portuarios ou normativa de planeamento portuario vixente en cada caso. As propostas deberán contar co consenso da comunidade portuaria, en especial das confrarías de pescadores e entidades colectivas xa instaladas nos portos. Con este obxectivo, o ente público insta aos colectivos interesados na habilitación de mariñas tradicionais a entablar un diálogo previo á proposta coas entidades afectadas en cada caso para obter o seu apoio, que será necesario para a materialización da proposta.