CICLISMO | ESTE DOMINGO
A Transheroica dá o pistoletazo á tempada de BTT en Galicia
Arranca o calendario 2017 de
competición de BTT en Galicia e faino cunha estrea. Este domingo celébrase a
primeira edición da Transheroica BTT, unha proba da modalidade de Cross Country
Maratón (XCM) organizada polo Clube Ciclista Chantadino. Con esta cita póñense
en marcha os Rankings FGC, que coroarán aos seus campións na Gala do Ciclismo
Galego do vindeiro ano.
Escairón, a capital do concello
do Saviñao, será o punto de saída e de chegada dunha carreira que presenta un
percorrido de 65 kilómetros. A partir das 9 da mañá daranse dúas voltas a un
circuíto no que os corredores transitarán polos montes das parroquias de
Abuíme, Seteventos, Ousende e Tuiriz.
“É unha zona espectacular para a
práctica do ciclismo. Non é un terreo excesivamente duro e as pistas son
anchas, moi boas para rodar”, comenta Xosé Ramón Caamaño, responsable da
organización. As principais dificultades deste trazado serán “dúas subidas
curtas pero esixentes. É un circuíto ideal para iniciar a temporada, dunha
dificultade media”.
O Clube Ciclista Chantadino,
cunha ampla experiencia en competicións de estrada, debuta promovendo unha
competición de BTT. O tempo semella que vai acompañar e a previsión
meteorolóxica indica que o domingo será un día soleado e de temperaturas
moderadas.
Máis de cen bikers xa confirmaron
a súa presenza e agárdase que finalmente se reúnan máis de 150. Os corredores
contarán con tres puntos de control con asistencia mecánica e avituallamento, e
na liña de meta disporán dunha carpa cuberta de 300 metros, do pavillón ao
carón da chegada para darse unha ducha e dun box de lavado para as bicicletas.
O prazo para anotarse remata este
xoves ás 20:00 horas e as inscricións realízanse a través da web de Emesports. Departamento de comunicación