PONTEVEDRA | SALÓN DO LIBRO

"O mundo que queremos" aposta polo cine

O Salón do Libro 2017 comeza a pechar algúns detalles da súa programación. Logo de coñecer hai un par de semanas os espectáculos teatrais que contarán con pases concertados con escolares e para público familiar, presentan un ciclo de cine de carácter infantil para as fins de semana.  Hai anos que o Salón aposta por este tipo de proxeccións e nesta ocasión, en colaboración co Cineclube Pontevedra, achegará 8 títulos entre os que se atopan estreas recentes de animación nas  que os valores de ‘O mundo que queremos’ están moi presentes.  


Sábado, 11 de marzo 

.- ‘Pompoko’, ás 12:00 horas: Isao Takahata, Xapón, 1994 Os mapaches viven felices nos montes: a comida abonda, a auga é clara, a convivencia coa humanidade, que os venera, é boa. Pero Tokio medra, os humanos precisan máis casas e o hábitat dos mapaches corre perigo. Fai falla un plan para frear o avance da humanidade! Duración: 114 minutos.

.- ‘O  teito do mundo’, ás 18:00 horas: Rémi Chayé, Francia, 2015 1882. San Petersburgo. Sasha é unha mociña aristócrata rusa fascinada pola vida de aventuras do seu avó Olukin, explorador de sona que fixo construír o Davai, un magnífico barco que nunca regresou da súa derradeira expedición ao Polo Norte. Duración: 81 minutos.



Domingo, 12 

.- ‘Neve e as árbores máxicas’, ás 12:00 horas: Antoine Lanciaux, Sophie Roze e Benoît Chieux, Francia, 2014 Catro contos inesquecibles que xiran arredor do medio ambiente e as árbores, en cuxos mundos, poboados por entrañables personaxes, hai un lugar para o enxeño, a amizade, o respecto e a alegría de convivir coa natureza. Duración: 51 minutos.

.-  ‘Brave’, ás 18:00 horas: Mark Andrews, Brenda Chapman e Steve Purcell, 2012, EE UU A princesa Mérida é unha hábil arqueira con ansias de vivir as aventuras que lle escoita ao seu pai, o rei Fergus. Por iso,  facéndolle fronte  ao destino e aos costumes do seu tempo, emprenderá unha longa viaxe  na procura do seu soño. Duración: 90 minutos.


Sábado 18

.- ‘Wall.E ‘, ás 12:00 horaas: Andrew Stanton, 2008, EE UU Ano 2800. Unha Terra devastada e sen vida. Tras centos de solitarios anos limpando o lixo do planeta, Wall.E atópase con Eve, unha moderna robot exploradora con quen vivirá unha emocionante aventura ao longo da Galaxia. Duración: 103 minutos

.- ‘Zootrópolis’, ás 18:00 horas: Byron Howard, Rich Moore e Jared Bush, 2016, EE UU Cando a optimista Judy Hopps pon un pé en Zootrópolis, decobre que ser unha coelliña nun corpo de policía cheo de temibles animais non é doado. Decidida a mostrar a súa valía, lánzase a resolver un caso, aínda que isto implique traballar canda a un raposo lingoreteiro coma Nick Wilde. Duración: 108 minutos.


Domingo 19

.-  ‘O principiño’, ás 12:00 horas: Mark Osborne, 2015, Francia Adaptación animada da obra mestra de Saint-Exupéry. Unha nena que está a ser preparada pola súa esixente nai para vivir no mundo adulto faise amiga do seu veciño, un excéntrico e ancián aviador que lle vai revelar un mundo extraordinario onde todo é posible.. Duración: 106 minutos

.- ‘Buscando a Dory’, ás 18:00 horas: Andrew Stanton e Angus MacLane, 2016, EE UU Dory é un peixe cirurxián cunha irresistible personalidade. Sofre perdas de memoria a curto prazo, o que non adoita influír no seu bo humor e felicidade... Ata que se decata de que esqueceu algo ben importante: a súa familia! Duración: 103 minutos. Departamento de comunicación