A Xunta intensifica a loita contra a fraude fiscal

O presidente da Xunta, Núñez Feijóo, avanzou hoxe que o Goberno galego intensificou a loita contra a fraude fiscal, para reducir ao mínimo o número de persoas que non cumpren coas súas obrigas co resto da sociedade, e en 2016 fixo aflorar, a través da Axencia Tributaria de Galicia (Atriga), 139 millóns de euros de débeda non declarada.   

Segundo precisou o xefe do Executivo galego, do informe da Axencia Tributaria que hoxe coñeceu o Consello da Xunta despréndese que o ano pasado comprobáronse 280.400 autoliquidacións do Imposto de Transmisións Patrimoniais e do Imposto sobre Sucesións e Doazóns. Trátase dos dous tributos que concentran a maior parte dos ingresos tributarios que xestiona a Xunta. Isto supuxo un 6% máis de comprobacións que en 2015.   

Neste senso, unha das conclusións máis satisfactorias é que a fraude fiscal baixou en 2016, pois o 92% das autoliquidacións eran correctas, fronte ao 88% do ano anterior. Isto pon de manifesto que a inmensa maioría dos galegos paga os seus impostos en tempo e forma.   

Para as persoas que non cumpriron, a Atriga practicou 23.000 liquidacións, unha cifra que en consecuencia é menor que a de 2015. Froito deste labor de xestión, detectáronse 102,6 millóns de débeda tributaria sen declarar.   No que atinxe á área de inspección, a Atriga triplicou as actuacións realizadas sobre grandes patrimonios e, por estas vías, obtiveron 36,3 millóns de euros.   

Por outra banda, o número de bens valorados pola Axencia Tributaria superou os 517.000, o que supón un incremento do 1,1% respecto ao ano pasado.   

Así mesmo, o ano pasado concedéronse aprazamentos e fraccionamentos no pagamento de impostos por un importe de 21,1 millóns de euros, cantidade que supón unha baixada importante (14%) respecto ao ano pasado e que se debe a que, grazas á mellora da situación económica, os contribuíntes teñen menos dificultades para cumprir coas súas obrigas tributarias.   

Por outra banda, o plan de control tributario para 2017 caracterizarase pola busca de novas fontes de datos, principalmente a información procedente de internet e as redes sociais e o intercambio de datos coa Agencia Tributaria estatal, que pasará a ser a regra e non a excepción, o que permitirá mellorar a xestión dos datos e reducir os custos administrativos.   

Por exemplo, cotexarase coa Agencia Tributaria os datos sobre vivendas habituais, para que os beneficios fiscais vinculados a ela sexan outorgados de xeito rigoroso. Galicia tamén se vai beneficiar dos novos convenios de colaboración entre España e outros países, para facer aflorar patrimonio oculto.   

Por último, Feijóo especificou que nos Orzamentos que aprobou o Parlamento esta semana vai incluído un plan especial de control da fraude que nos permitirá obter outros 20 millóns de euros.