A Xunta destinará 30 millóns a fomentar o emprendemento no rural
O
vicepresidente da Xunta, Alfonso Rueda, avanzou un novo programa de formación e emprendemento no rural que, cunha
achega de 30 millóns de euros, beneficiará a 13.000 persoas.
Rueda
precisou que esta iniciativa, dirixida aos 241 concellos que están declarados
como zonas pouco poboadas e que agrupan arredor do 27% da poboación, contará
con cinco medidas fundamentais para o apoio ao emprendemento e outras cinco
para impulsar a formación.
No
tocante ao emprendemento, destacou a posta en marcha do Programa Galicia
Emprende Rural, unha nova actuación do Igape dotada con 2,5 millóns de euros
para promover a diversificación e creación de novas empresas non agrícolas no
rural. “Son axudas á primeira implantación de novas actividades económicas non
agrarias e que sexan viables”, dixo. Ademais, engadiu que os destinatarios
deste programa serán os agricultores ou membros dunha unidade familiar dunha
explotación que diversifiquen as súas actividades en ámbitos non agrarios,
pemes de nova creación ou que inicien actividades non levadas a cabo antes e
autónomos. As axudas incluirán unha
contía básica de 20.000 euros que poderán incrementarse ata un máximo de 70.000
euros.
Outras
accións previstas neste eixo serán a creación de 6 laboratorios cooperativos no
rural; así como a mellora dos incentivos á contratación, cun orzamento de 1,7
millóns de euros, dándolles unha intensidade maior -dun 25%- para as empresas
do rural ao tempo que se impulsará o contrato para a formación e a aprendizaxe
en compañías desta zona a través do deseño de itinerarios á carta das empresas.
Por
outra banda, potenciarase con 3,8 millóns de euros os centros coworking no
rural. Tamén se reforzarán as axudas dirixidas aos concellos para a creación de
Espazos de emprendemento activos de comercio.
Impulsar a formación
En
relación ás medidas para impulsar a formación, Rueda anunciou a elaboración dun
Plan de formación en industriais forestais, dotado con 2,3 millóns de euros, e
que terá como obxectivos: aumentar a oferta formativa en forestal, carpintería
e madeira nos centros de formación profesional de economía; consolidar o Centro
integrado de formación do Pedroso, en Santiago, como centro de referencia na
área forestal; potenciar o CIS Madeira da Axencia Galega de Innovación como un
espazo de formación para as empresas e técnicos das industrias forestais; e
promover o Centro de investigación agroforestal de Lourizán.
Así
mesmo, porase en marcha a iniciativa Formación á porta, unha actuación pioneira
coa que se levará aos concellos que non conten con centros homologados as
actuacións necesarias para obter os certificados de profesionalidade centrados
nas oportunidades de colocación desas zonas. E reforzarase tamén as
aceleradoras de emprego con 2 millóns de euros, que priorizará aos municipios
que contan con menos recursos.
Obradoiros de emprego
No
eido dos obradoiros de emprego, Rueda subliñou que se investirán 12,5 millóns
de euros na posta en marcha de 70 obradoiros, cos que se prevé beneficiar a
1.400 persoas. Por último, Rueda aunuciou que se impulsarán os servizos de
intermediación laboral co reforzo da Rede de orientadores de emprego no rural,
a modernización de 36 oficinas de emprego do rural, e engadiu que cada concello
do rural disporá dun orientador propio.