MELLORAR A XESTIÓN DE TERRAS

Medio Rural subvenciona con máis de 100.000 euros unha aplicación informática

mellorar a xestión de terras

A Consellería do Medio Rural subvenciona con preto de 103.000 euros o proxecto de deseño dunha aplicación informática para mellorar a xestión de terras nas cooperativas gandeiras. Esta achega enmárcase na convocatoria de axudas para a execución de proxectos dos grupos operativos da Asociación Europea da Innovación (AEI).   

Esta iniciativa innovadora pretende contribuír a aumentar a sustentabilidade ambiental e económica das explotacións e, ao tempo, mellorar a eficiencia enerxética e obter, polo tanto, unha redución nas emisións de CO2 facendo uso das Tecnoloxías da Información e a Comunicación (TIC). Trátase de aplicar métodos informáticos e matemáticos para desenvolver un algoritmo que permita obter alternativas para a organización espacial das parcelas. O obxectivo é reasignar os predios entre os agricultores de maneira que, sen modificar a súa superficie nin propiedade, cada un teña as parcelas máis próximas entre si e máis preto de cada explotación.   

Pártese da idea de que o axeitado dimensionamento das explotacións agrarias é clave para asegurar a súa viabilidade económica e ambiental, en especial a través da contención dos custes de produción. Na gandaría de vacún iso pasa fundamentalmente pola xestión eficiente da base territorial. Considérase que unha produción baseada en pastos e forraxes propios, con parcelas cunha dimensión axeitada e accesibles, axudaría a incrementar o rendemento das explotacións e a revalorizar as granxas, reducindo os custes e a dependencia de insumos externos, co conseguinte aumento da marxe de beneficios.   

Esta é a finalidade do proxecto subvencionable, no que participan dúas cooperativas agrogandeiras, Cusoviame e Os Irmandiños (actualmente integrada en Clun), da man da asociación de desenvolvemento rural Mariñas-Betanzos, as universidades da Coruña e Santiago e o Instituto Galego da Calidade Alimentaria (Ingacal).   

A consellería aprobou esta iniciativa por considerala punteira, innovadora e necesaria, xa que permitirá optimizar a xestión da terra agraria mediante a aplicación das TIC. Este proxecto súmase así aos 24 aprobados pola Consellería do Medio Rural por un importe total de 2,8 millóns de euros. 


Proxectos innovadores

A resolución das axudas aprobadas pola Consellería do Medio Rural que van financiar un total de 25 plans do ámbito agroforestal foi publicada o pasado día 10 de febreiro no Diario Oficial de Galicia (DOG). Estes proxectos piloto teñen o obxectivo último de resolver un problema ou aproveitar unha oportunidade determinada nos sectores agroalimentario e forestal. Desenvolverán novos produtos, prácticas, procesos e tecnoloxías que fomenten a competitividade da agricultura, a sustentabilidade dos recursos naturais e do clima ou activen as economías e comunidades rurais.