POLÍTICA
Feijóo: "Os gobernos do PP sempre cumpren"
O presidente do PPdeG, Núñez Feijóo, participou este sábado no Congreso dos populares da Comunidade de
Madrid, no que resultou elixida presidenta do partido Cristina Cifuentes.
Segundo Feijóo, esta escolla é o primeiro paso para conformar unha nova maioría
estable no goberno desta autonomía nas vindeiras eleccións de 2009.
O líder dos populares galegos
valorou de xeito positivo o primeiro ano e medio de mandato de Cifuentes como
presidenta da Comunidade, e destacou fitos da súa xestión que tamén se
produciron nos últimos tempos en Galicia, como a redución das listas de espera
na sanidade pública, o aforro dos mozos no transporte, a creación de novas
prazas de escolas infantís, a atracción de importantes investimentos ou a
diminución das cifras de paro.
Neste sentido, Feijóo subliñou
que os gobernos do Partido Popular “sempre cumpren”, e desbotou a posibilidade
de que fose froito da casualidade, a sorte ou a coxuntura. “Temos os mellores
proxectos e os mellores equipos”, subliñou, para apuntar que os executivos
populares “ofrecen estabilidade, crecemento e benestar para os españois de hoxe
e de mañá”.
Pola contra, o referente dos
populares galegos apuntou que os gobernos doutras formacións “presentan un
preocupante cadro clínico de incerteza e parálise”. Así, comparou a
administración que lidera Cifuentes coa da cidade de Madrid, gobernada por
Podemos, que neste máis de ano e medio nos deixou “moitísimos titulares e
palabras altisonantes, pero moi poucos feitos”. “Non falamos dun problema
endémico da filial de Podemos da capital, senón
que é algo que comparten todas as súas marcas ao longo e ancho de España”,
matizou.
Exemplo de unidade
O presidente celebrou a “ilusión” que se transmitiu durante todo o Congreso
por parte da agrupación madrileña, e volveu pedir que estas citas volvan ser un
“exemplo de unidade” fronte a outras formacións, nas que “primarias significa purga”.
Así, destacou que en toda España, os cidadáns demostraron que valoran que o PP sexa
un partido cohesionado dentro da súa
diversidade, coherente sen caer en
dogmas e predicible dentro do dinamismo.
No peche da súa intervención, Feijóo sentenciou que, para vindeiras citas
electorais “as cartas xa están enriba da mesa” e que os cidadáns saben o que
poden agardar de cada unha das organizacións. “Agora xa sabemos que hai
partidos instalados no ‘non’, outros tan centrados en si mesmos que son
incapaces de propoñer nada”, reprochou, e apuntou que outros “deciden a súa
liña política segundo con que pé se levanten”.
Fronte a todos estes, reivindicou ao PP como un partido “fiable, estable e
centrado no benestar dos cidadáns”. Así, lembrou que malia que no contexto
actual é complicado conseguir maiorías absolutas, o PPdeG logrouno o pasado
setembro e situou ao PP madrileño como capaz de repetir esa fazaña nun futuro. Departamento de comunicación