GALICIA | REPÚBLICA DE CABO VERDE

Feijóo aposta por intensificar a cooperación coa República de Cabo Verde

O presidente da Xunta, Núñez Feijóo, apostou hoxe por intensificar a cooperación coa República de Cabo Verde, “unha terra –dixo- chea de oportunidades” en eidos como a pesca, o turismo e o medio ambiente.   

Tras unha reunión co presidente do país, Jorge Carlos de Almeida Fonseca, Feijóo destacou a súa visita como un chanzo máis na relación entre ambos os pobos, que xa fora selada no Memorando de entendemento asinado entre o Goberno galego e o caboverdiano o ano pasado.   

A través desta sinatura estanse a promover actuacións encamiñadas a contribuír ao progreso e á mellora da calidade de vida dos cidadáns de Cabo Verde. Así como a reforzar os lazos que unen ambos os territorios, especialmente os vínculos coa lusofonía.   

O titular do Executivo autonómico lembrou que hai xa catro décadas que Burela se converteu na capital da comunidade caboverdiana en Galicia, onde vive xa a terceira xeración de caboverdianos nados en territorio galego.   

Feijóo concluíu incidindo en que Galicia é unha terra que, lonxe de construír muros, avoga por tender pontes, consciente de que abrirse a outras comunidades é compartir fortalezas. “E nós queremos seguir aproximándonos a Cabo Verde, seguir aprendendo da súa xente e seguir convivindo e compartindo experiencias”, asegurou.