A sanidade pública galega reducirá a taxa de persoal eventual ao 5%
O presidente da Xunta, Núñez
Feijóo, salientou hoxe que a Sanidade pública galega reducirá a taxa de persoal
eventual ao 5%, tres puntos por debaixo do obxectivo asumido polo Ministerio de
Hacienda e os sindicatos. Esta é unha das metas que se marca o Plan de
estabilidade do persoal estatutario do Sergas, que recibiu onte o visto e prace
do Consello.
Feijóo
precisou que este plan, subscrito polos sindicatos profesionais da Mesa
sectorial da Sanidade e polos representantes da Consellería, garante maior
estabilidade para os profesionais da Sanidade pública. Ademais, se a nivel
estatal se chega a un acordo que o permita, en 2017 ofertaranse 1600 prazas,
tantas como en toda a pasada lexislatura.
Respecto á
redución da eventualidade, o presidente da Xunta resaltou que no bienio
2017-2018 o Sergas dotará unhas 800 prazas para converter persoal eventual en
interinos en praza vacante. A día de hoxe, o 50% desta medida xa está
executada, pois desde o pasado 1 de abril 438 eventuais xa son interinos. No
segundo semestre deste ano formalizaranse 200 novas interinidades e outras 200
no primeiro semestre de 2018.
Melloras nos concursos de traslados
O Sergas
comezará a incluír nos concursos de traslados as prazas cubertas con interinos.
Tamén se van negociar as bases do primeiro concurso de traslados aberto e
permanente, que garantirá unha mobilidade laboral máis áxil. Prevese que a
Xunta estea en disposición de convocar este concurso no último trimestre do
ano. “Cada vez que haxa unha praza nun sitio non será necesario convocar un
concurso, senón que se poderán solicitar para traballar máis preto da parella
ou da familia”, indicou Feijóo.
Outra das
melloras que inclúe o Plan de estabilidade é que os procesos de selección para
postos de xefatura, coordinación e directivos pasarán a estar dispoñibles de
xeito electrónico, en aras dunha tramitación máis sinxela e transparente.
O proceso
de selección de facultativos especialistas de área desenvolverase conforme a
unhas bases negociadas, comúns e uniformes en todas as xerencias do Sergas. Por
último, o acordo contempla a constitución dunha Comisión coas organización
sindicais asinantes do pacto, co obxectivo de seguir o cumprimento destas
medidas e o calendario establecido.