UNIVERSIDADE | USC
Chega a Santiago a XV edición do Encontro Universitario de Danza Contemporánea da USC
“Saír ao encontro do público e favorecer as actividades
comúns ao colectivo de profesionais da danza” son os dous obxectivos principais
que se marca o director do Espazo de Danza da USC, Juan Carlos Zahera, no XV
Encontro Universitario de Danza Contemporánea que chega a Compostela á volta
das vacacións de Semana Santa.
Nesta ocasión, as actuacións correrán a
cargo de compañías galegas, cunha participación especial das integradas por
coreógrafos e bailaríns da USC. Pero o encontro non é só unha programación de
espectáculos, como matiza Zahera, senón que se concibe tamén “como un espazo de
residencia e de traballopara os artistas participantes”.
Programa
O programa de actuacións, que conta coa colaboración do
Concello de Santiago e a Deputación da Coruña, será os días 17 e 18 de abril no
teatro Principal ás 21.00 horas, con entrada gratuíta previo paso pola
billeteira.
A primeira xornada inauguraraa a Compañía de Danza do
IV Ciclo Sen vergoña da USC-Lugo que dirixe o propio Zahera. Porán
en escena a peza ‘Comeza por UN 1,2,3...’,
o impulso co que se chega a conseguir todo. Seguiralle
a Compañía de Danza da USC-Lugo coa obra ‘Pulsos’, sobre o ritmo da vida, e
rematará con ‘Envés’, da compañía USCompostela, un canto á diversidade,de
corpos con universos compartidos nun mesmo tempo.
Xa o martes 18 será a quenda da compañía independente
da USC SON´S coa peza ‘Puzzle’, sobre os medos e inseguridades persoais, e do
grupo de Danza Normal da Universidade
da Coruña que interpretarán ‘Clásicos maxmix’, unha reinterpretación de catro
dos máis famosos ballets clásicos como ‘O lago dos cisnes’, ‘O quebranoces’,
‘Romeo e Xulieta’ e ‘A consagración da primavera’. USCompostela será
quen, novamente con ‘Envés’ clausure estes encontros de danza que xa son cita
obrigada na cidade. Departamento de comunicación