ALZHÉIMER
Sanidade reúnese con representantes da Federación de Alzhéimer de Galicia
O conselleiro de Sanidade, Vázquez Almuiña, recibiu hoxe aos representantes da Federación de Alzhéimer Galicia. Na xuntanza, na que estivo presente o director xeral de Asistencia Sanitaria do Sergas, Jorge Aboal Viñas, abordáronse diversos temas tales como o Plan de actuación para o desenvolvemento dunha estratexia interdepartamental da Xunta de Galicia referida ao alzhéimer e outras demencias; o proxecto de prevención de enfermidades en persoas coidadoras de familiares de enfermos con alzhéimer e outras demencias, así como do convenio de colaboración entre o Sergas e a Federación de Asociacións Galegas de Familiares de Enfermos de Alzhéimer (Fagal). No encontro estiveron presentes, por parte de Fagal, o seu presidente, Juan Carlos Rodríguez Bernárdez; Carmen Pena Lado, vogal da Federación; e Javier Hermida Porto, coordinador da oficina técnica.
O titular da carteira sanitaria do Executivo galego reiterou na reunión o compromiso do Goberno galego de seguir apostando pola sensibilización, prevención e formación fronte ao alzhéimer, e destacou o traballo diario que realiza Fagal neste campo, prestando un apoio fundamental tanto aos enfermos como aos seus familiares.
Sanidade está a traballar, desde hai anos, no ámbito do envellecemento activo, ofrecendo solucións no eido da atención non presencial, a integración de coidados ou a promoción da saúde na poboación anciá e con patoloxía crónica. Estase, así mesmo, realizando unha colaboración intensa co movemento asociativo e desenvolvendo labores de información, orientación e atención interdisciplinar dos pacientes e das familias, e cooperando na formación continuada dos profesionais e colaboradores das asociacións, así como nas actividades de sensibilización social.
Cómpre lembrar, así mesmo, que Sanidade incluíu aos pacientes de alzhéimer na tarxeta AA, acompañamento e accesibilidade, que implicada a prioridade no acceso aos servizos sanitarios e permite que os enfermos estean acompañados por un familiar durante os procesos de atención sanitaria.