GALICIA

O tráfico e o ruido de ocio seguen a ser os principais axentes de contaminación acústica

Con motivo da conmemoración do Día internacional de concienciación sobre o problema do ruído, a  Consellería de Medio Ambiente e Ordenación do Territorio vén de facer público esta mañá o Informe sobre o ruído ambiental de 2016. Deste documento despréndese que o tráfico e o ruído de ocio seguen a ser os principais axentes de contaminación acústica de Galicia.    

En termos xerais, os valores obtidos en 2016 melloran lixeiramente con respecto aos históricos. Neste senso, os valores que máis baixaron foron os da estación de San Caetano (Santiago), e en menor medida Fingoi (Lugo) e Riazor (A Coruña), mentres que Parque Reina Sofía (Ferrol) sufriu un incremento dos mesmos; pola contra, as estacións de Campus (Santiago), Coia (Vigo) e Estación (Ourense) presentan uns valores idénticos aos históricos. 

Obsérvase unha mellora dos datos de 2016 respecto dos históricos, para todos os casos, así como que o valor de Lden (índice ponderado de ruído día-tarde-noite) para a denominada zona residencial resulta elevado, debido a realización de eventos de ocio, mentres que o seu valor mediana (L50) acada valores esperables. O resto de zonas presentan valores propios das localizacións, sendo a zona verde a que proporcionalmente acada os mellores resultados segundo o indicado de valores de referencia.   

Asemade, o valor de ruído residual en 2016 para o conxunto das estacións foi de 38 dB, fronte a un histórico de 40 dB, acadándose un valor mínimo absoluto de 35 dB; polo tanto tamén é posible reducir o ruído de fondo natural, o que existe cando se eliminan todas as fontes específicas de ruído, como, por exemplo, o tráfico e o ruído de ocio.   

Este informe é o segundo sobre Ruído Ambiental que publica a Administración Autonómica dende a aprobación do Decreto 106/2015, e o quinto da serie que comezou en 2013 cos datos da Rede de Ruído da Xunta de Galicia, referidos á situación acústica do ano 2012 en zonas puntuais das cidades galegas, representativas dunha cidade tipo de Galicia. Cómpre aclarar que neste informe indícanse unicamente valores referentes a ruído, aínda que a contaminación acústica abrangue a presenza de ruído e/ou vibracións no medio ambiente.   

A Comunidade Autónoma de Galicia é unha das máis avanzadas, dentro do conxunto do Estado, na adaptación e concienciación fronte á contaminación acústica, pois conta cunha ampla lexislación e coa existencia dunha rede de observación autonómica. De todos os xeitos, aínda queda moito treito por percorrer, especialmente no referente a zonificación do territorio, e aplicación das medidas administrativas e mellora dos niveis de ruído.   

A redución do tráfico e a limitación da velocidade de circulación dos vehículos, un bo asfalto, a promoción do tren, a implantación de barreiras antiruído e a elección de materiais illantes, xunto co compromiso social no cumprimento da lexislación, son medidas de protección fronte ao ruído, que melloran a calidade de vida e facilitan o progreso das sociedades.   

As zonas verdes moderan os niveis de ruído de recepción, actuando como barreiras acústicas naturais, polo tanto a aplicación de medidas como a promoción de zonas verdes (que á vez crean distancia entre o emisor acústico e o receptor) en áreas residenciais, e máis en concreto entre zona de tráfico e vivendas, é unha recomendación para diminuír os niveis de contaminación acústica e adaptarse a un bo ambiente.   Outro aspecto a ter en conta son os eventos de ocio, aínda que puntuais, teñen unha grande repercusión nos valores anuais, sendo un factor que dispara os valores de ruído na zona onde se desenvolven, e especialmente por ter lugar en horario nocturno.   

Tanto é así que, a influencia dos días que teñen lugar, sendo pequena, provoca que os índices de ruído anuais superen amplamente os 65 dB, con picos horarios superiores a 85 dB (facendo que as zonas afectadas se asemellen a zonas de tráfico denso), acadándose valores límite esperables na zona o resto do ano.

Actualmente se estima que en Europa dúas de cada tres persoas están sometidas a niveis de ruído molestos, situación que repercute na súa calidade de vida, chegando a provocar diversos trastornos, principalmente de tipo cognitivo nos máis novos por alteración do sono, ou de tipo arterial nos adultos, e os seus efectos representan un gasto socioeconómico inxente para as sociedades.   

Na páxina web de Meteogalicia pódese acceder ao Informe sobre o ruído ambiental de 2016 para ampliar esta información. , os valores que máis baixaron foron os da estación de San Caetano (Santiago), e en menor medida Fingoi (Lugo) e Riazor (A Coruña), mentres que Parque Reina Sofía (Ferrol) sufriu un incremento dos mesmos; pola contra, as estacións de Campus (Santiago), Coia (Vigo) e Estación (Ourense) presentan uns valores idénticos aos históricos.