DEPUTACIÓN DA CORUÑA

Destina máis de 335.000€ a conservatorios e escolas de música e danza dos concellos

A área de Cultura da Deputación da Coruña destina un orzamento de 335.200€ ao programa de subvencións a concellos para o mantemento de conservatorios e escolas de música e danza municipais.

A liña de subvencións para centros de formación municipais no ámbito da música e danza da Deputación da Coruña apoiará o funcionamento de 30 centros correspondentes a 28 concellos segundo a concesión provisional que se fai este xoves pública no Boletín Oficial da Provincia.

“Desde a Deputación queremos apoiar os centros de música e danza dos concellos que é fundamental para promover un maior acceso á formación cultural de toda a poboación”, destaca Goretti Sanmartín, responsábel da área de Cultura da Deputación da Coruña. “Os centros municipais non só contribúen a crear novos e novas artistas senón que, ao noso ver, teñen tamén un papel fundamental no acceso á cultura xa que son centros dinamizadores non só para o alumnado senón para todo o entorno ao seren focos de creación e difusión”, engade Goretti Sanmartín que, ao tempo, recoñece que a liña de subvencións “responde á filosofía da Deputación que quere apoiar a creación cultural máis alá das cidades, é dicir, que as persoas que viven en concellos medianos e pequenos teñan posibilidade de ter os mesmos servizos que os núcleos máis grandes de poboación”. Departamento de comunicación