Cultura convoca axudas por valor de 100.000 euros para a recuperación da memoria histórica

A Consellería de Cultura vén de convocar axudas por un valor de 100.000 euros para actividades a prol da recuperación da memoria histórica en Galicia, publicadas onte no Diario Oficial de Galicia (DOG). O prazo de presentación de solicitudes remata o 20 de abril. As subvencións, destinadas a particulares, asociacións e institucións culturais, pretenden impulsar accións de recuperación da memoria histórica tanto no eido da investigación como no da homenaxe e a divulgación. Para a concesión destas axudas valorarase a súa relevancia socio-cultural e a continuidade no tempo do proxecto. As subvencións apoiarán iniciativas de investigación e homenaxe arredor das vítimas da represión franquista, a recollida de testemuñas orais das vítimas e dos seus familiares ou a compilación de documentación escrita relacionada con este asunto, así como a organización de cursos, congresos, seminarios e xornadas. Ao tempo, serán subvencionables as propostas de recoñecemento de intelectuais, artistas e persoeiros da cultura perseguidos, asasinados ou exiliados, as que recuperan a historia das mulleres vítimas da dictadura e as que fagan un estudo sobre os campos de concentración e sobre a participación dos galegos na Segunda Guerra Mundial. Outra das características que subliña a convocatoria céntrase na investigación do patrimonio histórico-artístico, tanto o que foi incautado como o que se desenvolveu nos países de destino dos exiliados.