POLÍTICA | PSdeG
Caballero anima ao PSdeG a recuperar o protagonismo na vida galega
O
secretario xeral do PSdeG-PSOE, Gonzalo Caballero, salientou que o XIII
Congreso do socialismo galego supón un “punto de inflexión” neste partido, e chamou
á militancia, aos 10.000 mulleres e homes socialistas, a converterse “no
exército do cambio que Galicia agarda” para liderar unha coalición de progreso “retirar
ao PP do Goberno da Xunta”.
Para acadar este obxectivo o PSdeG debe de acadar
“máis músculo” na rúa. Na xornada de clausura, Caballero falou dunha nova etapa
no PSdeG e presentou un partido máis aberto e máis activo, “recuperemos o estar
presente na sociedade” e crear “unha alternativa de esquerdas”.
Caballero imponse a labor de construír “unha coalición
social de progreso, co activismo social, os sindicatos, os movementos agrarios,
e as ongs”. Se hai tantos vectores de cambio, de insatisfeitos coa dereita, “hai
que ordenalos detrás do PSdeG para cambiar o Goberno do PP”.
“Comecemos a traballar polas municipais”, dixo en
recordo do próximo compromiso electoral que deben afrontar, en 2019. Neste sentido
Gonzalo Caballero instou aos seus compañeiros e compañeiras a recordar á
cidadanía a nosa capacidade de Goberno” demostrada ao longo da historia. Só os
socialistas son a garantía de “gobernos estables como alternativa á dereita e á
ineficacia e demagoxia doutras formacións que teñen emerxido” aseverou.
Congreso
“Temos feito un bo congreso”, afirmou Caballero, que
salientou o reforzo dos alicerces internacionalistas e galeguistas do partido e
a defensa do social, así como a incorporación dun marcado “compromiso verde” pola
sostibilidade.
Salientou a nivel orgánico a recuperación da estrutura
comarcal, que reforzará o apoio aos concellos. Defendeu tamén a autonomía do
PSdeG desde a lealdade ao Partido Socialista. Destacou e agradeceu o esforzo de
todas as delegacións para acadar un acordo que levou a contar cunha executiva
respaldada polo 71,18%. Despediuse dos delegados e delegadas lembrando que “todos
somos instrumentos ao servizo dunha causa: o interese xeral da cidadanía
galega, que nos agarda”.
Apoio a Pedro Sánchez
O líder dos e das socialistas de Galicia fixo unha
breve referencia ao conflito en Cataluña para recalcar que o Partido Socialista
defende o internacionalismo e o galeguismo, “non quere fronteiras”. “Non somos
independentistas nin nacionalistas, os socialistas creemos no imperio da lei e
no diálogo”, dixo.
O PSdeG debe impregnarse ademais dos “signos de
modernidade” e ser capaz de seguir o círculo ascendente da aberto tras as
primarias nas que saíu elixido Pedro Sánchez, a quen agradeceu a presencia no
XIII Congreso e lle brindou o “respaldo do socialismo galego”.
“Se aproveitamos as primarias, e o ciclo electoral que
se abriu con esta consulta”, que asimilou ao de outros momentos como o de
Felipe González ou Zapatero, “poderemos lograr o cambio en España, acabar cun
goberno sen proxecto e inmerso na corrupción como o do PP”. O cambio, asegurou,
“só será posible co impulso do PSOE e presidido por Pedro Sánchez”.