SANTIAGO | ATENEO
Joan Clos, nos Luns do Ateneo
Santiago. O vindeiro luns, Compostela terá a honra de recibir da man do Ateneo de Santiago e os seus actos do X Aniversario ao ex-Director executivo do Programa Habitat da ONU e ex-alcalde de Barcelona Joan Clos, quen impartirá unha conferencia enmarcada dentro do ciclo “Repensar as cidades”.
A partir das 20.00 horas no Auditorio Abanca da Rúa Preguntoiro e baixo o título “A nova axenda urbana para o século XXI”, Clos poñerá en cuestión o actual sistema urbano, presentando un cambio de paradigma baseado en normas e principios para a planificación, construción, desenvolvemento, xestión e mellora das zonas urbanas sostido sobre cinco piares fundamentais como son as políticas urbanas nacionais, a lexislación e normativa urbanas, a planificación e deseño urbano, a economía local e finanzas municipais e a implementación local. A nova axenda urbana, aprobada pola conferencia da ONU Habitat III en Ecuador, representa un ideal común para lograr un futuro mellor e máis sostible, onde todas as persoas gocen de igualdade de dereitos e de acceso aos beneficios e oportunidades, proporcionando os principios e as prácticas para trasladalo ao mundo real.
Joan Clos substituíu en 1997 a Pasqual Maragall como alcalde de Barcelona, permanecendo no cargo ata 2006. O seu mandato está caracterizado pola concepción, preparación e celebración do primeiro Fórum Universal de las Culturas, celebrado en 2004, e a conseguinte reurbanización da área de Besós e Diagonal Mar, un proxecto dez veces maior que o dos Xogos Olímpicos de 1992. Tamén puxo en marcha o Proyecto 22@, un novo barrio tecnolóxico construído sobre o Poblenou, e a remodelación de La Sagrera ante a chegada do AVE. En 2006 substituíu a José Montilla como Ministro de Industria, Comercio e Turismo de España, cargo no que permaneceu dous anos, e posteriormente foi Embaixador de España en Turquía e Azerbaiyán. En outubro de 2010 a Asemblea Xeral da ONU designouno Director Executivo do Programa de Nacións Unidas para os Asentamentos Humanos (ONU-HABITAT), con rango de Subsecretario Xeral de Nacións Unidas, cargo que ocupou ata xaneiro deste ano, cando foi sucedido pola malaia Maimunah Mohd Sharif. Departamento de comunicación