GALICIA | EDUCACIÓN

A Consellería de Educación convocará 2.064 prazas de docentes en 35 especialidades

A Consellería de Educación, Universidade e Formación Profesional, representada polo director xeral de Centros e Recursos Humanos, José Manuel Pinal, presentoulle hoxe á mesa sectorial do ensino non universitario a proposta de oferta pública de emprego para o ano 2019. En total serán 2.064 prazas en 35 especialidades diferentes, de xeito que se seguirá avanzando na diminución da taxa de interinidade dos corpos docentes, que xa é a máis baixa de todo o Estado.

A Consellería incrementou o número de prazas inicialmente previsto despois de atender as peticións dos membros da Comisión de Seguimento do Acordo de Estabilización de Emprego.

Como novidade cabe salientar a oferta de prazas para profesores de ensino secundario na especialidade de Portugués, no marco do compromiso da Xunta de Galicia de avanzar no desenvolvemento da Lei Valentín Paz-Andrade.

Cómpre sinalar que esta é a oferta pública de emprego no ensino máis ampla que se ten realizado en Galicia na última década. A previsión é que a convocatoria saia publicada no Diario Oficial de Galicia no primeiro trimestre do ano, co fin de que as probas se realicen unha vez remate o curso escolar.