GALICIA
Galicia acollerá un encontro de correspondentes xuvenís de toda España para promocionar o alberguismo
A directora xeral de Xuventude,
Participación e Voluntariado, Cristina Pichel, anunciou hoxe que Galicia
acollerá o que será o primeiro encontro de correspondentes xuvenís das
diferentes comunidades autónomas, que terá lugar a fin de semana do 5 ao
7 de abril no albergue xuvenil de Gandarío, no municipio coruñés de
Bergondo. A directora explicou que o obxectivo desta cita, que organiza a
Rede Española de Encontros Xuvenís (REAJ), é dobre: mellorar a
capacitación dos participantes como transmisores de información de
interese para a xente nova e promocionar o alberguismo.
Ademais,
Cristina Pichel destacou a importancia deste encontro para que mozos e
mozas procedentes de diferentes puntos de España compartan experiencias e
melloren dunha forma lúdica a súa formación como correspondentes.
Trátase de que teñan máis coñecementos no que respecta ás instalacións
xuvenís e sobre as vantaxes de programas como o carné de alberguista.
O
encontro será totalmente gratuíto para os participantes que resulten
seleccionados. Escolleranse un máximo de 20 correspondentes xuvenís de
cada comunidade autónoma, que cursen 2º, 3º, 4º de Secundaria ou 1º de
bacharelato. Os interesados deben enviar, en grupos de dúas persoas e un
máximo dun grupo por instituto, un vídeo no que difundan os atractivos,
lugares, puntos de interese e albergues xuvenís de Galicia. Esta
presentación visual durará entre un e tres minutos e teñen de prazo
desde hoxe mesmo ata o 18 de febreiro para envialo ao correo
institutoxuventude.ctb@xunta.gal.
A selección dos dez mellores
proxectos farase a través dun xurado que os fará públicos no portal web
de Xuventude o día 11 de marzo. A selección comunicarase así mesmo
mediante correo electrónico. Posteriormente organizaranse os grupos e
informarase das charlas, actividades de carácter lúdico e cultural e
demais programación que se desenvolverá durante o encontro.