GALICIA | NAVANTIA
Conde incide en que a orde de execución das F-110 ten que ir ligada á activación do plan estratéxico de Navantia
Ferrol | O conselleiro de Economía, Emprego e
Industria, Francisco Conde, incidiu hoxe durante un encontro
organizado polo Club de Prensa de Ferrol en que a orde de execución das
fragatas F-110 ten que ir ligada ao desenvolvemento do plan estratéxico
de Navantia, para impulsar así a competitividade do estaleiro. Isto
permitirá, sinalou, avanzar no rexuvenecemento do persoal e na
formación, tanto en Navantia como nas auxiliares, un eido no que a Xunta
xa investiu 15 millóns de euros.
A activación desta folla de
ruta, tal e como indicou o conselleiro, tamén posibilitará contar cun
estaleiro 4.0, no que a Xunta xa deu os primeiros pasos no 2015 coa
Unidade Mixta de Investigación de Navantia coa Universidade da Coruña,
que vén de prorrogarse e que en total supón un investimento de 5 millóns
de euros.
O conselleiro cualificou de “oportunidade histórica
para Ferrol e para consolidar o sector naval” o contrato das fragatas,
que suporán un investimento de 4.325 millóns de euros, case 7.000 postos
de traballo e unha década de carga de traballo para o estaleiro. O
Goberno dilatou no tempo a decisión, que conta desde o mes de xuño con
252 millóns de euros incluídos nos orzamentos de 2018. Conde indicou así
mesmo que o proxecto debe servir para abrir un novo escenario para o
estaleiro, que ten que ser competitivo desde o punto de vista do proceso
de produción e constituírse como un provedor de referencia para outros
países.
Na súa intervención, Francisco Conde demandou de xeito
específico un plan de negocio e de actividade para Navantia Fene, en
cuxa diversificación se vén traballando desde o 2015, e que se ten
convertido nun socio de referencia no ámbito da eólica offshore. De
feito, o responsable de Economía, Emprego e Industria sinalou que
Navantia Fene é hoxe o reflexo de como a industria naval galega aposta
pola diversificación, o que ten contribuído a que Galicia sexa
actualmente a Comunidade que máis contratos ten en vigor, coa segunda
maior carteira de pedidos de toda Europa, só por detrás de Holanda. Así,
os estaleiros galegos contan con catro de cada dez contratos en
carteira do total de toda España, que supoñen 750 millóns de euros de
investimento e 4,2 millóns de horas de traballo.
O conselleiro
apuntou que hai determinados factores que poden contribuír á
desaceleración da economía, como poden ser o Brexit, as tensións
comerciais a nivel internacional, ou a política enerxética, coa
preocupación polo incremento do prezo enerxético dun 25% desde maio e as
políticas con respecto ao diésel. Apuntou o conselleiro que desde o ano
2015 a cidade naval diminuíu en sete puntos o diferencial con Galicia
en taxa de paro, pero aínda hai moito por facer para mellorar o mercado
laboral, e así, a taxa de paro de Ferrol está 3 puntos por riba da media
galega.
Orzamentos do Estado
Fronte a este contexto, os
orzamentos do Estado, segundo o conselleiro, non teñen en conta a
Galicia nin a Ferrol. Referiuse a proxectos concretos en relación a
Navantia, ao non incorporar a partida para o recrecido do guindastre
pórtico de Fene, que tiña unha plurianualidade de 8 millóns de euros,
dos que 5 millóns estaban previstos para os presupostos de 2019, e
tampouco a partida do dique seco cuberto. Tamén lembrou Conde que nos
orzamentos estatais a renovación da liña A Coruña-Ferrol conta con 1,5
millóns de euros fronte aos 10 millóns do 2018. Tamén rexeitou o
conselleiro de Economía, Emprego e Industria a decisión do Goberno
central de eliminar a convocatoria específica de axudas á
reindustrialización para Ferrol, Eume e Ortegal. Apuntou que se seguirá
reclamando este programa desde a Xunta, unha Administración que amosou
solvencia en temas estratéxicos para Ferrol como o tax lease, a
diversificación de Navantia Fene, a terminal de contenedores ou
Reganosa.
Compromiso da Xunta
Neste sentido, o conselleiro
subliñou que as comarcas de Ferrol, Eume e Ortegal supoñen o 5% do
territorio e a poboación de Galicia e captaron o 14% dos proxectos de
grandes investimentos do Igape, que entre 2009 e 2018 formalizou máis de
3.600 operacións na comarca por un importe superior a 290 millóns de
euros cos que se mobilizaron 575 millóns. Ademais, nestes tres últimos
anos apoiáronse diversos proxectos de emprendemento que supuxeron un
investimento de 2,3 millóns. No encontro celebrado no parador ferrolán
Conde afirmou que todas as políticas da Xunta teñen tres prioridades á
hora de apoiar a dinamización empresarial: a dixitalización, os
proxectos de innovación, como o estaleiro 4.0, e a formación, sinalando
que a Xunta impulsou a inclusión de 32 novas especializades no catálogo
estatal, das que seis son do naval.
Retos de futuro
No
tocante aos retos de futuro para a comarca de Ferrol, o conselleiro
apuntou que pasan por impulsar o naval e o hub de GNL, xunto coa
colaboración institucional, apuntando que non é posible atender as
necesidades da terceira área metropolitana de Galicia sen a cooperación
co resto de administracións. Neste ámbito, puxo como exemplo iniciativas
como os Concellos Emprendedores, un distintivo co que xa contan seis
municipios das comarcas de Ferrol, Eume e Ortegal (Ares, Cabanas,
Cerdido, Fene, Narón e Neda), polo seu compromiso para favorecer a
chegada de empresas e o fortalecemento e competitividade do tecido
empresarial.