GALICIA | SAÚDE

Sanidade conmemora o Día Mundial da Tuberculose

A Consellería de Sanidade conmemora mañá o Día Mundial da Tuberculose, reiterando o seu compromiso de continuar cos esforzos e actuar en consonancia coas estratexias e obxectivos propostos pola Organización Mundial da Saúde, na súa tentativa de eliminar esta enfermidade no ano 2050. Aínda que os indicadores do funcionamento do programa galego de tuberculose son favorables, o departamento que dirixe Jesús Vázquez Almuiña recorda que non se pode baixar a garda, diagnosticando precozmente os novos casos, identificando os contactos e aplicando o tratamento adecuado.

O Programa galego de prevención e control da tuberculose 2017-2020, posto en marcha pola Dirección Xeral de Saúde Pública, ten como obxectivo a redución da incidencia desta enfermidade nun 25% para o ano 2020 en comparación cos niveis de 2015, camiño de ser considerada así unha comunidade de baixa incidencia. 

Dende a posta en marcha do programa galego, iniciado en 1996, obsérvase unha tendencia descendente e progresiva. En concreto, dende 1996 ata 2017, a incidencia da tuberculose pasou de 71,8 casos por 100.000 habitantes a 19,5, o que se traduce nunha diminución por término medio anual do 6%. 

A incidencia da tuberculose bacilífera, a máis contaxiosa, pasou de 28 casos a 5,6 por 100.000 habitantes no período 1996-2017, cun descenso relativo anual do 7,4%, diminución moi notable posto que implica a eliminación das fontes de infección na comunidade. 

O principal factor de risco asociado foi o tabaquismo no 22,2%, seguido de ser contacto recente cun caso de tuberculose pulmonar bacilífera (12,3%), e as enfermidades crónicas debilitantes (8,3%). Segundo a localización, o 51,8% dos casos tiñan unha presentación exclusivamente pulmonar, o 33,2% só extrapulmonar e o 15% presentaban ambas localizacións. Dos casos novos de tuberculose pulmonar, o 43,5% era bacilífero, o tipo con máis capacidade de contaxio.  


Importancia do diagnóstico e tratamento precoz  

A Consellería de Sanidade está a reforzar as actuacións para diminuír o atraso diagnóstico e cortar a cadea epidemiolóxica de transmisión, concienciando á poboación e aos profesionais da necesidade de diagnosticar e tratar precozmente esta enfermidade, especialmente os casos máis contaxiosos. 

É importante destacar, tamén, que o 95,4% do total de casos que iniciaron tratamento no ano 2016 curáronse, esta porcentaxe sitúase moi por riba do obxectivo da Organización Mundial da Saúde que é do 85%. A este bo dato contribuíu o traballo desenvolvido polos equipos das unidades de tuberculose de Galicia, que contan cun traballador social en cada unha delas e avaliaron a adherencia ao tratamento no 85,2% de todos os casos, detectando a necesidade de instaurar tratamento supervisado no 54,5% deles. A supervisión dos profesionais controlando a toma de medicación pode ser diaria, semanal ou con outra periodicidade, segundo os casos. 

No tocante á prevención, Sanidade subliña que se debe continuar cos esforzos na identificación e tratamento dos contactos infectados, tanto nenos como adultos, situación determinante para a prevención de futuros casos de tuberculose.

A Dirección Xeral de Saúde Pública da Consellería de Sanidade é consciente de que para conseguir as metas marcadas é indispensable seguir actuando de maneira coordinada, sabendo que se lograron avances considerables pero que hai que seguir a traballar para acadar que un programa efectivo como o galego acade aínda unha maior calidade, asumindo as ambiciosas perspectivas da Organización Mundial da Saúde, expandindo os esforzos xa despregados e buscando fórmulas innovadoras para deter a tuberculose en Galicia.