GALICIA

O IGE constata unha baixada do número de fogares que chegan con dificultade a fin de mes

O número de fogares galegos que chega con algunha dificultade a fin de mes diminuíu 2,56 puntos porcentuais no primeiro trimestre deste ano en relación co trimestre anterior, ao pasar do 46,12% ao 43,56%. Esta é a segunda cifra máis baixa de toda a serie histórica, segundo a última Enquisa Conxuntural da Fogares do Instituto Galego de Estatística (IGE).

Este descenso é consecuencia da diminución do número de fogares que chegan con dificultade –que pasan do 40,25% ao 38,03%– e da baixada que tamén se rexistra na cifra de fogares galegos que chegan con moita dificultade a fin de mes, que pasa do 5,87% ao 5,53%. Pola contra, no primeiro trimestre do ano medraron os fogares que chegan con facilidade ou moita facilidade a fin de mes, que pasan do 53,87% ao 56,43%.

O número de fogares que declaran ter dificultades económicas tamén mellora en comparación co mesmo período do ano anterior. Así, a cifra de fogares con dificultades a fin de mes baixou 3,83 puntos, mentres que se reduce case á metade a porcentaxe de fogares que chegan con moita dificultade. En contraste, no último ano a porcentaxe de fogares que declara chegar con facilidade ou moita facilitade a fin de mes aumentou 9,15 puntos, ao pasar do 47,28% ao 56,43%. 


Indicador de confianza 

En canto ao indicador de confianza do consumidor (ICC), este indicador descendeu medio punto respecto ao trimestre anterior, ao pasar do -11,53% ao -12,02%. No primeiro trimestre de 2019 diminuíron tres dos catro indicadores parciais de perspectivas de evolución que configuran este indicador (capacidade futura de aforro e perspectivas de evolución da situación económica de Galicia e do desemprego), mentres que aumentou o indicador de situación financeira persoal.