GALICIA | CHINA
A Xunta destaca o incremento do 30% nas exportacións realizadas a China respecto a 2018
Vigo | O conselleiro de Economía, Emprego e
Industria, Francisco Conde, destacou hoxe en Vigo, durante un
xantar-coloquio do tecido empresarial co embaixador da República Popular
da China en España, Lyu Fan, as boas relacións entre ambos os dous
territorios. Neste sentido, explicou que a Xunta de Galicia agarda
seguir colaborando co país asiático para abrir novas vías de negocio.
Conde
agradeceu ao embaixador de China a confianza depositada en Galicia, tal
e como amosan os investimentos que se están a realizar (preto de 120
millóns de euros na última década), ou feitos como a participación da
industria agroalimentaria galega na Feira de Importación de China o
pasado mes de novembro, un evento ao que acudiron na súa primeira
edición 14 empresas e ao que Galicia xa mostrou o seu interese de
participar de novo, xa que supón unha gran oportunidade para consolidar a
entrada de produtos galegos no país asiático.
Tal e como asegurou
o conselleiro, China é un socio estratéxico para consolidar o
crecemento económico de Galicia e lembrou que, grazas ao tecido
empresarial galego, as exportacións medraron un 30% a este país -que é a
2º economía mundial e o 2º importador e consumidor do mundo- no
primeiro trimestre deste ano con respecto ao mesmo período de 2018.
O
conselleiro incidiu no esforzo que a Comunidade está realizando no eido
da internacionalización, tanto para abrir novos mercados para as
empresas galegas, como para a captación de novos investimentos. Nesta
liña, lembrou as iniciativas incluídas na Lei de implantación
empresarial para facilitar tanto a tramitación administrativa como o
acceso ao solo, como é o caso da figura dos Concellos Emprendedores ou
das Iniciativas empresariais prioritarias.