GALICIA
A Xunta anima aos veciños para "implicarse" na defensa das súas aldeas fronte ao lume coa limpeza de parcelas
A Consellería do Medio Rural colaborará
coa Sociedade Galega de Pastos e Forraxes (SGPF) na mellora da xestión
da biomasa nas proximidades dos núcleos de poboación, impulsando o
pastoreo nas franxas de protección das aldeas. Así o acordaron o propio
conselleiro, José González, e os responsables deste colectivo, tras unha
reunión de traballo en San Caetano, na que tamén participaron os
directores xerais de Gandaría, Agricultura e Industrias
Agroalimentarias, José Balseiros, e de Planificación e Ordenación
Forestal, José Luis Chan.
Na xuntanza abordouse a importancia de
fomentar actividade agrogandeira nesas faixas de xestión da biomasa,
como estratexia para a prevención e defensa fronte os incendios
forestais e valorouse a achega que pode facer a SGPF nesta materia, no
contexto das propostas de traballo da consellería en relación coas
recomendacións da comisión de política forestal do Parlamento. Outros
asuntos abordados neste encontro tiveron que ver coa incorporación de
persoas mozas ao agro ou coa planificación da nova PAC.
A
Sociedade de Pastos e Forraxes é unha asociación sen ánimo de lucro que
integra máis de 80 gandeiros, técnicos e investigadores centrados no
aproveitamento, mellora e divulgación de todas aquelas ferramentas que
permitan a mellora dos sectores gandeiros implicados na xestión do
territorio pola súa necesidade de produción forraxeira.Na reunión
de traballo, o conselleiro e os directores xerais agradeceron aos
representantes da SGPF a súa disposición a colaborar e as súas achegas,
que enriquecen e reforzan o traballo da Xunta a prol do agro galego,
neste caso no eido do fomento do pastoreo.