GALICIA | SALÓNS DE XOGO

A Xunta reúne este luns á Comisión de Xogo para entregarlle o borrador da nova lei

Salón de xogo.

A Xunta reúne mañá, luns, á Comisión de Xogo, á que lle fará entrega do borrador da nova Lei do sector que ten entre os seus principais obxectivos reforzar os controis e fomentar o xogo responsable. O texto inclúe aspectos reclamados tanto polas asociacións de ludópatas, como polo propio sector.

Entre as novidades da Lei, o novo texto incluirá a limitación do número de salóns de xogo e tendas de apostas que se poden instalar en Galicia. Este mesmo mes o Consello da Xunta xa aprobou un acordo para limitar as autorizacións e evitar especulacións antes da entrada en vigor deste novo texto normativo. Deste xeito, o número de autorizacións en ambas tipoloxías estará limitado -igual que no acordo aprobado transitoriamente- ás que xa existen na actualidade e ás que están en tramitación. Isto é, o límite sitúase en 118 salóns de xogo (97 xa funcionando e 21 expedientes pendentes) e 41 tendas de aposta, todas funcionando e sen ningunha solicitude en tramitación na actualidade.

Deste xeito, dótase dunha planificación de autorizacións a estes dous tipos de establecementos, posto que os casinos e salas de bingo xa contaban cunha planificación destas características. De feito, modifícase a planificación de salas de bingos, que ata agora configurábanse en función da poboación e non do número de establecementos, e no novo texto pasará a fixarse nun máximo de 12 establecementos: os que existen na actualidade. 

Outra das principais novidades será a limitación tamén do parque de máquinas recreativas e de máquinas de apostas. Actualmente, cando unha máquina se daba de baixa definitiva, podían autorizarse novas ata chegar ao límite establecido. Coa nova normativa, as máquinas que se dean de baixa irán reducindo o límite máximo na proporción correspondente e non se poderán dar novas autorizacións. 

Do mesmo xeito, e na mesma liña de establecer por unha oferta respectuosa e responsable, ampliaranse na práctica as distancias entre establecementos de xogo. Manteranse os 150 metros de distancia entre os establecementos de xogo e os centros escolares con menores de idade, pero cambiará o sistema para medilos. Actualmente, calcúlanse tendo en conta as vías que usaría unha persoa para ir andando dun punto a outro. Coa nova lei pasarase a medir radialmente, co que na práctica a distancia será maior. Ademais, unifícanse as distancias que deben separar aos distintos establecementos. Na normativa vixente, fíxanse 300 metros de distancia co mesmo tipo de establecemento: por exemplo, un salón de xogo con outro salón de xogo. Agora fixaranse eses 300 metros entre calquera tipo de establecemento de xogo, sexan do tipo que sexan. Isto é, un salón de xogo terá que estar como mínimo a 300 metros de distancia doutro salón de xogo, pero tamén dunha tenda de apostas ou dun bingo. 

A regulación da publicidade será tamén unha das grandes apostas desta nova lei. Aínda que se remitirá a un desenvolvemento regulamentario posterior e máis específico, o novo texto xa determina que só se permitirá a publicidade en prensa escrita e limitada a supostos concretos e tasados na norma, así como nos locais específicos de xogo.

A nova Lei do Xogo tamén actualiza o réxime sancionador, cunha nova enumeración das faltas moito máis adaptadas á situación actual. Ademais, aclárase mellor quen é o responsable das distintas infraccións.