GALICIA | CSHG
O Centro Superior de Hostelería de Galicia festexa mañá os seus 25 anos
O Centro Superior de Hostelería de
Galicia (CSHG) festexará mañá mércores o seu 25 aniversario no marco da
terceira edición de HotelForum, o foro impulsado pola Consellería de
Cultura e Turismo orientado a estudantes e profesionais do sector
turístico que este ano afondará nos retos e oportunidades do sector
hoteleiro galego de cara ao Xacobeo 2021.
Desde as 10,00 horas, o
Museo Centro Gaiás da Cidade da Cultura acollerá o encontro no que
participarán destacados profesionais do sector hoteleiro, moitos deles
antigos alumnos do CSHG. Afondarán en cuestións como os desafíos e
oportunidades que supón a convivencia dos canais de venda tradicionais
ante a chegada do Big Data, a xestión da diversidade cultural e
necesidades específicas dos distintos tipos de viaxeiros nos
establecementos hoteleiros, a creación de novos modelos que
diversifiquen a oferta ou o peso da xestión económica e financeira na
toma de decisións da empresa.
Na primeira das mesas redondas
–centrada na comercialización hoteleira– contarase coa participación de
Berta Gacho, de Meliá; Ainhoa Benavente, de Expedia Partner Solutions:
José Enrique Lázaro, de World2meet, e Pablo Guitián, de AC Hotels. Pola
súa banda, Lucía Iglesias, de A Quinta da Auga; Héctor López, do
Restaurante España; Sergio Delpont, do Restaurante O Sendeiro, e Vanesa
Pradera, do Restaurante Lume participarán na mesa que coordinará Andrés
Rumbo, experto en recursos humáns do CSHG, sobre a xestión da
diversidade nos establecementos hoteleiros.
O programa de
relatores completarase con Anxo Rodríguez, do Faro de Corrubedo; Lilian
Ferral, do Parador de Monforte de Lemos; Jorge San Martín, do Hotel
Monumento San Francisco; Annia Gonzar, do Hotel Bela Fisterra e Hostel
Bela Muxía, ou Anxo Bernárdez, de Como en Casa, que afondarán na
evolución do produto hoteleiro. No relatorio ao redor da xestión
económica e financeira no sector participarán Paula Ferro, do Hotel
Santa Justa Lisboa; Francisco Plaza do Parador de Baiona; Ana Domínguez,
de Sol Meliá, Fernando Jalón de Reig Capital, e José Luis Sieira,
experto en finanzas do CSHG.
Prazo de inscrición aberto
A
terceira edición do HotelForum está dirixida profesionais, estudantes e
interesados no sector turístico e o prazo para participar está aberto. A
asistencia é gratuíta, previa inscrición na páxina web do Centro
Superior de Hostelería de Galicia e no enderezo info@cshg.es. Os
participantes nesta edición poderán conmemorar ademais o 25 aniversario
do CSHG, a través da diferentes actividades especiais que están
programadas. Así, a partir das 11,30 horas celebrarase un acto central
no que se recoñecerá o labor de diferentes cadeas hoteleiras que veñen
colaborando nestes últimos anos co Centro Superior de Hostelería de
Galicia.
No transcurso do foro tamén se premiará ao propio Centro a
quen lle será entregado o premio Escola de Referencia, que outorga a
Asociación Catalá de Xornalistas e Escritores de Economía e Turismo Rede
de Xornalistas de Turismo. Haberá tamén un xantar de confraternización
coa participación de antigo alumnado do CSHG á fronte dos fogóns.