POLÍTICA | BNG
O BNG celebra un cumio de planificación de política municipal
O BNG celebra este vindeiro
domingo en Santiago un gran encontro de responsables políticos locais que
congregará a máis de 200 alcaldes, alcaldesas e concelleir@s na capital de
Galiza, para establecer unha planificación de política municipal a medio prazo
e partindo da consideración de que o traballo que o Bloque desenvolva nas vilas
e cidades será clave de cara a abrir un novo tempo político nas eleccións
galegas de 2020.
A formación nacionalista quere aproveitar que é unha forza política á alza para
visibilizar que ten un proxecto solvente e serio para o país, como demostra alí
onde ten responsabilidade de goberno a nivel municipal e, ao mesmo tempo, para
significar que ten proxecto, equipo e liderado para ir a por todas nos comicios
galegos e encabezar a alternativa que mande ao PP e a Feixóo á oposición.
Neste contexto enmárcase a campaña de celebración do Día da Patria -Galiza, un novo impulso-, coa que se dirixe a esa maioría social que quere pasar
a paxina do PP para que se sume ao BNG na construción dun país próspero,
soberano e con futuro. Mesmo desde o punto de vista organizativo, este cumio
municipal quere tamén poñer en valor a condición de terceira forza política nos
concellos, con representación en máis do 90% dos municipios galegos.
De
feito, tras o 26M, o Bloque suma un total de 456 concelleiros e concelleiras, 195 mulleres (42’76 %) e 261 homes (57’24%), dos que debutan por
primeira vez na política municipal un total do 33% dos concelleiros e
concelleiras electas.
A xornada será inaugurada pola portavoz nacional, Ana Pontón, e contará
coas intervencións da responsable de estratexia no ámbito municipal, Eva Villaverde; da coordinadora xeral desta
área, Carme da Silva; e da responsables de iniciativas políticas locais e
alcaldesa de Tomiño, Sandra González. Tamén terán unha intervención específica responsables municipais como Evencio
Ferrero (Carballo), Beatriz Bascoi (Moeche), Diego Lourenzo (Verín) ou Marcos
Suárez (Moraña).
Este cumio municipal terá lugar este domingo 7 de xullo en Santiago no
hotel Os Abetos, e tamén servirá para
compartir experiencias de éxito de goberno en distintos concellos. En palabras
da coordinadora da xornada, Eva Villaverde, “este encontro é ademais unha oportunidade física de compartir a enerxía, o entusiasmo, e a ilusión
que nos une como formación política que está afrontando un momento de
crecemento no apoio social”. Departamento de comunicación