PORTUGAL | GALICIA

A Xunta destaca o compromiso de Galicia e Portugal por adecuar os perfís profesionais á demanda actual do mercado laboral

A secretaria xeral de Emprego, Covadonga Toca, asistiu esta mañá á inauguración do 21 Congreso internacional Galicia/Norte de Portugal de formación para o traballo que se celebrará ata o sábado, 21 de setembro, en Santiago de Compostela, e que se centrará na empregabilidade e mobilización do talento sénior. Toca destacou o compromiso de ambos os dous territorios por unha xusta creación de emprego e subliñou que apostar pola formación e a orientación permitirá adecuar os perfís profesionais á demanda do actual mercado laboral e garantir que as competencias estean aliñadas coas necesidade do tecido empresarial.

Así, o Goberno galego traballa por ofrecer unha formación axustada ás necesidades reais a través do Plan Galego de Formación, as Unidades Formativas en empresas, tanto para empregados como desempregados, ou os obradoiros duais. No plano da orientación os esforzos estanse dirixindo cara unha orientación laboral aberta baseada nas TIC e na redución de burocracia. 

A secretaria xeral referiuse ao traballo da Xunta para crear máis emprego de calidade e ao esforzo que se está realizando por incentivar a contratación, especialmente nos colectivos con máis dificultades, como os maiores de 45 anos. Neste sentido, o programa Galicia Emprega, no que a Xunta ofrece tanto un bono formación para a adaptación das persoas traballadoras como apoio á contratación, hai unha liña específica para este colectivo. Ademais, todos os programas enfocados para o fomento do emprego en Galicia contan cun incentivo dun 25% para a contratación de persoas de máis de 45 anos. Por outra parte, está en marcha a segunda convocatoria de Talento Sénior, iniciativa para reter ou facilitar o retorno de investigadores de alta cualificación con traxectorias consolidadas. 

No último ano a cifra de parados maiores de 45 anos reduciuse en 3.322 persoas e o 26% dos contratos realizados foron para este colectivo que supón o 48% dos afiliados en Galicia. Toca asegurou que os datos deben mellorar porque a transferencia de coñecemento experto é indispensable para unha transición interxeracional completa e global.