GALICIA | EDUCACIÓN

A Xunta destaca a importancia dunha educación diversa especializada como transición cara a integración social

O conselleiro de Economía, Emprego e Industria, Francisco Conde, achegouse hoxe ata a exposición Química para un mundo mellor, elaborada por alumnos da ESO e de Bacharelato do Colexio Peleteiro, do IES Rosalía de Castro e do Manuel Fraguas, e que se pode visitar no Centro Fonseca de Santiago de Compostela. Conde eloxiou o labor realizado polos estudantes e destacou a importancia dunha educación divulgativa, práctica, e adaptada ás necesidades do tecido empresarial galego de cara a unha mellor transición ao mercado laboral. 

Deste xeito, o titular de Economía, Emprego e Industria remarcou a importancia de recibir formación ao servizo da sociedade para poder xerar un cambio de modelo, fomentando o talento nos centros formativos e facilitando unha aprendizaxe especializada e profesional para transferir eses coñecementos ao mercado laboral. 

A este respecto, Conde destacou o valor da universidade como antesala do mundo profesional, sinalando o traballo da Universidade de Santiago de Compostela no seu ofrecemento de oportunidades académicas e laborais a centos de alumnos, baseando esta formación nun modelo diverso e exemplarizante.


A mostra 

A exposición, coordinada pola Real Academia Galega das Ciencias, conta con 20 paneis informativos e xira en torno ao 150 aniversario da creación da táboa periódica, dos principais retos do sector químico (como os combustibles fósiles, a farmacoloxía ou a biomasa), e tamén rende homenaxe a Tomás Batuecas, quen fora catedrático de Ciencias Químicas da Universidade de Santiago de Compostela e vicerreitor da mesma, e a quen se dedica o vindeiro Día da Ciencia en Galicia, que terá lugar o 8 de outubro.

Ademais, cada panel inclúe un apartado específico que salienta os fitos achegados polos investigadores químicos galegos, especializados segundo cadanseu ámbito de actuación.