POLÍTICA | BNG
Pontón: "Imos a por todas porque Galicia gana co BNG no Congreso"
Converter a inutilidade das forzas
estatais nunha oportunidade: a de darlle voz propia a Galiza para facer valer
no Estado os intereses dos e das galegas. Con ese obxectivo, proclamou a
portavoz nacional, Ana Pontón, o BNG sae a por todas para colocar Galiza na
axenda política do Estado a partir do 10N.
“Imos a por todas
para converter a decepción en ilusión, esperanza e confianza e ter voz no
Congreso da man dunha forza propia que, está demostrado, é a única maneira de
conseguir que as necesidades, aspiracións e soños da xente deste país cobren
forza. Ese é o compromiso do Bloque: dar a cara polos intereses dos e das
galegas”, salientou no acto de apertura de campaña cos e coas candidatas cabezas
de lista ao Congreso.
Tras o espectáculo
destes meses e o historial de discriminación das forzas estatais, “hoxe hai
miles de persoas que teñen clarísimo que Galiza gana cando o BNG está no
Congreso, que ven no 10N a oportunidade de facer algo diferente: apoiar ao BNG
para defender unha axenda de país que nos faga avanzar, que acabe con tanta discriminación
e pasotismo para facernos valer no Estado. En definitiva, para conseguir un futuro mellor”.
Pontón dirixiuse
ás persoas que poden estar “desesperanzadas” para dicirlles que hai alternativa
“se optamos por defender o noso dándolle voz propia a este país da man da única
forza que xoga a favor de Galiza”
A líder
nacionalista deixou claro que, nun escenario sen maiorías absolutas, a
representación do Bloque será decisiva e permitirá condicionar a política do
Estado a favor deste país: solucións a un sector industrial en crise, a favor
dos 22.000 usuarios que a diario soportan a estafa da AP9, a favor dos 200.000
mozos e mozas emigradas, darlle alternativa ás mulleres que reclamamos
igualdade, ou para afrontar os desafíos ambientais e sociais.
Pontón subliñou
que o Bloque “é a alternativa” ao bipartidismo PP-PSOE, expertos en dicir unha
cousa na oposición e facer a contraria cando gobernan ou ante un Podemos que pactou
os peores orzamentos do Estado para Galiza en vinte anos. “O BNG nunca lle
fallou a este país”, recalcou.
Desencanto e cabreo
Apelou as persoas “desencantadas
e cabreadas” porque viron como o voto as forzas estatais traduciuse, unha vez
máis, en 23 deputados e deputadas
electas “que non actúan en defensa de Galiza senón que van a Madrid a facer o
que lle mandan os seus xefes de filas”. Fracaso tamén das
forza da esquerda, que continuaron co mesmo ninguneo do PP a Galiza, e ademais
foron “inútiles” na defensa dos dereitos e das liberdades: aí seguen intactas a
Lei Wert, a Lei Mordaza e as contrarreformas laborais. Nin dereitos socias, nin
Galicia.
“A todas esas persoas
pídolles que esta vez fagan algo diferente: que aposten polo BNG, porque somos
a garantía de que defenderemos unha axenda de país e un axenda social de
dereitos e liberdades e democracia. Ese é o compromiso dunha forma con palabra,
que sempre estivo aí e nunca se equivocou de lado: o lado de Galiza, dos e das
galegas”, concluíu.
Rebeldía e inconformismo
Pola súa parte, a cabeza de lista por
Lugo, Olalla Rodil, fixo un chamamento a xente moza: “apelamos á esperanza, a
rebeldía e ao inconformismo da mocidade para gañar o futuro, non vale caer na
resignación nin nun suposto voto útil que pasa a ser como unha mala resaca ao
día seguinte pedimos confianza na
capacidade e no potencial do país para levar unha voz netamente galega ao
corazón político do Estado”.
Emerxencia ambiental
Carme da Silva, que lidera a candidata
por Pontevedra, apelou os feitos do BNG alí onde ten capacidade de decisión “para
facer do noso territorio o que ten que ser e non no que o teñen convertido hoxe,
demostrámolo nos concellos que gobernamos, demostrámolo en Pontevedra, un
referente internacional de políticas ambientais”. Salientou que a formación
nacionalista ofrece “un proxecto sólido, unido, coherente, que suma e confía na
sociedade galega. Queremos que a sociedade confíe en si mesma, iso é o que
pedimos este 10N”.
A Galicia interior
O candidato ao Congreso por Ourense,
Francisco García, fixo fincapé na urxencia de darlle voz propia á “Galicia
interior” parar deixar atrás as consecuencias “das políticas de PP e PSOE que significan
decadencia demográfica, económica e falta de perspectivas de futuro. Queremos
mudar esas políticas para darlle ao país un futuro mellor a partir do día 10N”.
Esta vez é posible
Nestor Rego, que encabeza a lista pola
Coruña, destacou que o BNG “estará no Congreso cunha actitude activa de defensa
dos intereses do país para colocar permanentemente sobre a mesa as necesidades
de Galiza, reclamar os investimentos necesarios e solucións de futuro”. “Está
vez é posible porque moitas persoas volven a mirar para o BNG, a única forza
galega que se presenta ás eleccións e a única que pode mudar a situación a
favor do país”, salientou, tras apelar a todas as persoas decepcionadas co
fiasco das forzas estatais. Departamento de comunicación