POLÍTICA | BNG

Pontón pide a Feijóo se aclare se está do lado de Galicia ou da extrema dereita que quere ilegalizar ao BNG e ás institucións galegas

A portavoz nacional, Ana Pontón, considera que o debate a cinco entre os candidatos das forzas estatais só fixo dar novos motivos para votar BNG. Por tres razóns: constatou a ausencia de Galicia, -salvo mencións anecdóticas ao longo de tres horas-, a persistencia do circo e a irresponsabilidade na que están inmersas as forzas estatais e, finalmente, tamén interpela a Feijóo para que aclare se apoia os pactos do PP coa extrema dereita que quere ilegalizar as institucións democráticas galegas e a unha forza nacionalista como o Bloque.

A líder nacionalista fixo fincapé na extrema dereita que, en prime time, pediu a ilegalización das institucións democráticas galegas, a ilegalización da autonomía, do autogoberno e dunha forza como o BNG, que ten como obxectivo a defensa de Galicia. Polo que interpelou directamente a Feijóo sobre os pactos do PP cunha extrema dereita que pretende ilegalizar Galicia.

“Houbo unha forza política coa que pacta e goberno o PP de Feixóo que pediu a ilegalización das institucións de autogoberno de Galiza, que había que ilegalizar ao Parlamento galego, á Xunta e a forzas políticas democráticas como o BNG, única e exclusivamente por defender os intereses deste país”, recalcou, por iso, “quero emprazar a Feijóo porque non pode seguir calado e de perfil cando o Seu partido está gobernando cos que queren suprimir e ilegalizar o autogoberno de Galiza, suprimir e ilegalizar a forzas políticas democráticas”, recalcou.  

“Feijóo ten que dicirnos antes do 10N de que lado de está: se está do lado da democracia ou está do lado dos que queren liquidar o autogoberno de Galiza, é importante que no lo aclare, senón di nada, será cómplice dos que queren que Galiza non exista, ten que aclarar se  está a favor ou non dos pactos do seu partido con quen quere ilegalizar as institucións democráticas de Galicia”, demandou.

“Vimos un debate de tres horas no que Galicia volveu ser unha anécdota, unha anotación a pé de paxina, unha nova constatación de que se queremos ter voz propia, se queremos que os intereses deste país pesen no Estado é necesario que o BNG teña representación no Congreso a partir do 10N. Somos a única garantía de que os problemas deste país e da súa xente van estar, a única garantía para cambiar o pasotismo e a discriminación pola defensa dos seus intereses dos galegos e das galegas”, alegou.

Pontón tamén denunciou a persistencia do bloque e do “espectáculo lamentable no que está convertido a política española”, un falso debate “no que pesaron máis os egos, a frivolidade, e moi pouco darlle alternativas reais ante aos problemas do país, cuns candidatos que parecen moi cómodos perpetuando unha situación de bloqueo”.