GALICIA | BFAERO
A aceleradora BFAero recibe 40 novos proxectos
Un total de 40 proxectos aplicables ao sector aeronáutico e dos
vehículos non tripulados optan a formar parte da segunda edición da
aceleradora Business Factory Aero (BFAero) tras pecharse o prazo de
presentación de solicitudes. As iniciativas están xa na fase de
preselección, na que agora serán avaliadas polo Comité Executivo de
BFAero. Só seis obterán finalmente unha praza para participar no
programa, que forma parte da Civil UAVs Initiative (CUI) impulsada pola
Xunta de Galicia.
O prazo para a presentación de candidaturas
nesta segunda convocatoria finalizou o pasado venres 15 de novembro ás
14.00 horas cunha alta participación. Máis da metade dos proxectos
presentados son de Galicia (25 deles), seguido de Madrid con 6 e das
provincias de Barcelona e Granada, con dous proxectos cada unha. O resto
proveñen de Salamanca, Biscaia, Palma de Mallorca, Alacante ou
Valencia.
Durante a primeira semana de decembro o Comité
Executivo de BFAero dará a coñecer a súa selección dun mínimo de 10
proxectos que poderán defender a súa candidatura nunha entrevista e no
Pitch Day que se celebrarán en Lugo os días 12 e 13 de decembro. A este
mínimo de 10 proxectos que superarán a primera criba sumaranse
directamente os dous elixidos mediante a votación popular celebrada na
páxina web de BFAero, que terán garantida a súa praza na entrevista e no
Pitch Day. Tras a selección final, un máximo de seis startups formarán
parte da aceleradora (tres en fase de incubación e tres de aceleración) e
sumaranse ás seis da primera edición que xa están a traballar en BFAero
desde hai uns meses.
Máis dun centenar de candidaturas en só un ano
Os
resultados desta segunda edición confirman o auxe e interese que
esperta un sector tan específico como o da aeronáutica e os vehículos
non tripulados. En só un ano, BFAero lanzou dúas convocatorias nas que
se presentaron máis dun centenar de candidaturas, 62 delas procedentes
de Galicia. Estes datos reforzan o importante papel da Civil UAVs
Initiative para reter e captar talento na comunidade galega, que
conseguiu converterse xa nun polo aeronáutico de referencia en España.
Por
áreas temáticas, un 43% dos proxectos presentados están relacionados co
deseño e produción de vehículos non tripulados. As tecnoloxías
habilitadoras son o segundo
foco temático con máis presenza nas candidaturas desta segunda
edición (case un 32%, tendo en conta que un mesmo proxecto pode
adscribirse a varias categorías diferentes), seguido dos proxectos
relacionados coa obtención de datos e información e coas cargas de pago e
sistemas, con case un 30% cada unha.
BFAero ofrecerá ás seis
startups que sexan seleccionadas un completo plan para o desenvolvemento
e lanzamento do seu produto ou servizo no mercado local, nacional e
internacional, cunha duración de 24 meses para a etapa de incubación e
de 12 meses para a de aceleración. Así, terán á súa disposición titorías
e mentorización con expertos no sector, acceso ás instalacións e
equipos da CUI, oficina propia e espazos para realizar coworking e
recibir unha completa formación en todos os aspectos que afecten á súa
idea de negocio. Os proxectos contarán con asesoramento tecnolóxico e
acceso a potenciais clientes de ámbito internacional. Ademais poderán
dispor de UAVs de Indra e Babcock de maneira gratuíta e de horas de voo
bonificadas. Tamén terán a opción de obter a certificación de piloto.
Apoio económico a fondo perdido
BFAero
é a aceleradora deste sector con maior dotación de apoio económico de
Europa. Os proxectos admitidos na aceleradora disporán do apoio
económico da Xunta de Galicia. En concreto, accederán a un financiamento
de ata 100.000 euros a fondo perdido na fase de incubación e de ata
50.000 na de aceleración. Adicionalmente, optarán a un financiamento en
forma de préstamos de INDRA (a través de Indradventures) de entre 50.000
e 500.000 euros en incubación e sen límite en aceleración, préstamos
convertibles e tecnoloxía a cambio de capital (Tech4Equity). Ademais, na
fase de aceleración terán acceso a préstamos participativos de ata
250.000 euros da Xunta de Galicia a través de XesGalicia.
A Businnes Factory Aero, impulsada pola Xunta de Galicia, acolle as
empresas nas súas instalacións da Fundación CEL Iniciativas por Lugo.
BFAero é un proxecto de equipo. Aos membros da Xunta, que inclúen a
Igape, XesGalicia e a Axencia Galega de Innovación (GAIN), súmanse
colaboradores de relevancia para garantir o éxito da iniciativa:
empresas tractoras líderes do mercado no sector como Indra ou Babcock, o
Centro Tecnolóxico de Automoción de Galicia (CTAG), pequenas e medianas
empresas relevantes polo seu coñecemento ou as súas tecnoloxías,
entidades como o Consorcio Aeronáutico de Galicia e xeradores de
coñecemento como as tres universidades galegas. Departamento de comunicación