POLÍTICA | BNG
Pontón presenta ante a militancia do BNG a súa candidatura á Presidencia da Xunta
Tras un período de reflexión, tanto no seu
entorno persoal como político, a portavoz nacional, Ana Pontón, presentou ante
a militancia do BNG a súa candidatura á Presidencia da Xunta baixo o lema Gañar unha nova Galiza, arroupada por un
grupo de xente nova que será, dixo, a protagonista do cambio real que precisa
este país cando en 2020 se celebren as eleccións galegas.
Deste xeito, Pontón da un paso adiante
e postúlase ante as bases para ser a candidata nacionalista, despois de que o
Consello Nacional abrise o proceso de consulta á militancia que concluirá o 18
de xaneiro coa proclamación do candidato ou candidata elixida en votación nas
asembleas comarcais que se celebrarán por todo o país.
“Tomo
esta decisión despois dun tempo de reflexión e despois de ter recibido moitas
mostras de confianza e mesmo peticións expresas para animarme a dar este paso, e
tamén tiveron moito peso as palabras de afecto das persoas, militantes e
simpatizantes anónimos, que se me achegaron para dicirme simplemente: Ana,
contamos contigo, este país precisa un cambio, e queremos contar contigo para
conseguilo”.
Unha
decisión que toma, -salientou-, “con toda a ilusión, con todo o compromiso e
con toda a responsabilidade para, como di o lema desta candidatura, Gañar unha nova Galiza, con futuro, na que poder vivir e traballar,
unha Galiza con oportunidades, orgullosa e soberana, na que se podan facer
realidade os soños e os proxectos vitais de cada unha de nós”.
Pontón
subliñou que o BNG está traballando desde xa para conseguir ese cambio real e
destacou as fortalezas da formación nacionalista: “temos proxecto político,
temos solvencia e seriedade, temos equipo e confiamos no potencial deste país”.
E, na súa aspiración a ser a candidata nacionalista, destacou que o obxectivo
de cara ás eleccións galegas é liderar o tempo novo que Galiza precisa.
“O BNG é
a mellor ferramenta política ao servizo dos e das galegas e por iso aspiro a
ser a candidata do BNG nas próximas eleccións á Presidencia da Xunta cun
obxectivo moi claro: liderar o cambio real que Galiza necesita e abrir un tempo
novo que deixe atrás a década de decadencia de Feixóo, que deixe atrás un
goberno acomplexado, que nunca estivo á altura deste país, instalado na
subordinación a Madrid ou na confrontación partidista”.
A líder
nacionalista considera que ese reto é perfectamente posible para un Bloque que
experimentou un relevo xeracional, que hoxe é máis sólido e cohesionado, que
non deixa de medrar en apoio social e electoral, que representa un espazo para
sumar a todas aquelas persoas que queren políticas propias autocentradas.
Ir a por todas na cita electoral 2020
“Estou
convencida de que hai unha maioría de galegas e galegos que aspira a ter esa
Galiza mellor, desde ideoloxías e visións diferentes do propio país, pero que comparten co BNG a aspiración de
vivir nunha Galiza mellor, con oportunidades, que coida o seu medio ambiente,
no que haxa sitio para a xente nova, un país cunha mirada propia para afrontar os
retos deste tempo”, argumentou na presentación da súa candidatura.
“A esa
maioría social é a que se dirixe o BNG, á que se dirixe este proxecto
nacionalista do século XXI, para ofrecerlles un país aberto, con máis
autogoberno, coa defensa da nosa identidade, da nosa lingua e da nosa cultura e
para que haxa máis e mellores oportunidades de futuro. Por todo isto, aspiro a
liderar á candidatura do Bloque á Presidencia da Xunta, nunha eleccións nas que
imos a por todas para conquistar ese país mellor que nos merecemos”, concluíu.
Proceso de elección
A
presentación de candidaturas para recabar o apoio da militancia estará aberto
até o 2 de decembro, ao que sucederá un proceso de votación nas asembleas
comarcais que se prolongará até o 13 de decembro. Coa decisión das bases, o
Consello Nacional proclamara ao candidato ou candidata elixida para dar o
proceso por concluído a mediados de xaneiro de 2020. Departamento de comunicación