GALICIA | DESEMPREGO
A Xunta destina preto de 10 millóns para mellorar a formación de 4.300 persoas en situación de desemprego
O presidente do Goberno galego, Núñez Feijóo, informou hoxe
na rolda de prensa do Consello, da resolución da convocatoria de axudas
dos programas integrados de emprego. Uns programas, dixo, que estarán
dirixidos tanto a concellos como a entidades sen ánimo de lucro e
permitirán a celebración de 43 iniciativas para mellorar a formación de
4.300 desempregados, cun investimento de preto de 10 millóns de euros.
En
concreto, explicou, 22 programas serán tutelados polos concellos,
mancomunidades e entidades dependentes, cunha inversión de 5 millóns, mentres
que os restantes 21 serán desenvoltos por institucións sen ánimo de
lucro, cun investimento de 4,9 millóns. A este respecto, Feijóo puntualizou
tamén que 5 dos programas estarán destinados en exclusiva a mulleres
desempregadas.
Nesta mesma liña, o presidente da Xunta subliñou
que a selección de participantes se levará a cabo durante un prazo
máximo de 2 meses a través das oficinas de emprego tendo prioridade: as
persoas con discapacidade, en risco de exclusión social, mulleres
vítimas de violencia de xénero, menores de 30 anos, maiores de 45 ou
inmigrantes entre outros colectivos. Do mesmo xeito, dixo, nesta
convocatoria primáronse os proxectos con implicación do tecido
empresarial de cada zona, os plans de xestión compartida promovidos por
concellos agrupados ou fusionados e tamén os que leven a cabo os
Concellos Emprendedores.
O presidente da Xunta destacou ademais
como principais novidades desta convocatoria: a inclusión do colectivo
de persoas beneficiarias da renda de inclusión social de Galicia e o
requisito de que a formación estea dirixida á obtención, polo menos, dun
certificado de profesionalidade. Xa para concluír, lembrou que os
programas integrados de emprego teñen un ano de duración e están
enfocados a mellorar a ocupación dos empregados establecendo como
obxectivo a inserción laboral dun mínimo do 35% dos participantes.
“Desde 2009 levamos investidos 55 millóns que beneficiaron a 34.000 persoas”,
abundou.