GALICIA | PENSIÓN CONTRIBUTIVA
Publicada a convocatoria de axudas sociais extraordinarias para os galegos coas pensións máis baixas
A Xunta destinará preto de 8 millóns de
euros a abonar unha axuda social extraordinaria ás galegas e galegos que
teñen unha pensión contributiva, perciban axuda do Fondo de Asistencia
Social ou son perceptores do Subsidio de Garantías de Ingresos Mínimos. O
Diario Oficial de Galicia (DOG) de
hoxe publica os requisitos para obter este complemento económico que
recibirán de oficio, sen necesidade de facer trámite algún, arredor de
38.500 persoas.
A contía da achega económica ascende a 206 euros
por beneficiario. A Administración autonómica fará efectivo este
complemento nos primeiros dez días de xaneiro nun único pagamento, para o
que as persoas destinatarias non terán que levar a cabo ningún trámite
adicional.
Deste modo, o Executivo autonómico mantén un ano máis
esta axuda como mostra do seu compromiso de apoiar ás familias e persoas
con menos recursos. Unha vontade que se volve plasmar nos orzamentos de
2020, que inclúen unha partida económica que garante a continuidade
deste complemento.