GALICIA | POLÍTICA
Gonzalo Caballero insta a Feijóo a acabar o ano "rachando calquera vía de acordo coa ultradereita"
O portavoz parlamentario do PSdeG, Gonzalo Caballero, reclamou hoxe a
Feijóo que acabe o ano “rachando calquera vía de acordo coa
ultradereita” e co compromiso de “deixar a súa estratexia cainita”
contra o goberno, porque “é fundamental para Galicia e para España”. “España
e Galicia necesitan un goberno en plenitude de funcións xa”, recalcou o
tamén secretario xeral dos socialistas galegos, quen recordou que só o
PSOE está “en condicións de formar goberno” tras gañar as eleccións
tanto no pasado mes de abril como o pasado 10 de novembro.
Neste
escenario, Gonzalo Caballero lamentou o “debate nesgado” que está
tentando formular o PP ao “laiarse” das negociacións do PSOE con ERC
“sen aportar a responsabilidade” de favorecer a investidura de Pedro
Sánchez coa súa abstención. De feito, despois de lamentar
que “a coalición dereitas coa ultradereita segue sendo un problema
para o país”, o líder do PSdeG criticou o seu “discurso falaz” sobre que
os acordos para a investidura de Pedro Sánchez poñen en risco o modelo
constitucional.
“Nós somos a mellor garantía da defensa da
Constitución”, resaltou. Ao fío disto, Gonzalo Caballero
recordou que o PSOE chegou a subscribir a aplicación do artigo 155 da
Carta Magna durante a etapa de goberno de Mariano Rajoy, o que dá a
mostra do compromiso socialista coa Constitución e co estado de dereito.
Fronte a esta posición, lamentou que “o PP perdeu o sentido de Estado”.
"Preocúpanos a ultradereita"
Así as
cousas, e tras reprobar que o PP prefira seguir instalado no “bloqueo”
ao goberno para forzar unhas terceiras eleccións, o máximo dirixente do
PSdeG volveu cuestionar os seus “acordos coa ultradereita”. No
caso concreto de Galicia, ademais, subliñou que Vox obtivo 100.000
votos nos últimos comicios, o cal implica a necesidade de frear á
ultradereita.
“Nós combateremos á ultradereita con toda a
nosa forza, porque pon en risco o noso modelo de convivencia, quere
facernos retroceder en avances sociais e liberdades políticas e quere
atacar o noso Estatuto de Autonomía”, evidenciou Gonzalo Caballero. Por
iso, instou a Feijóo a amosar esa “centralidade política” da que fala
aplicando a receita que tanto el como Pablo Casado requirían ao PSOE
para sacar adiante a investidura de Mariano Rajoy. “Está na súa man”, sinalou o secretario xeral do PSdeG,
consciente de que Galicia require un goberno central que atenda ás súas
necesidades.
“Necesitamos un goberno que continúe pola
senda da política social, con subas das pensións e do salario mínimo;
que afronte os riscos do Brexit e que aprobe o estatuto para as empresas
de consumo electrointensivo”, enumerou Gonzalo Caballero.