GALICIA | SOGAMA

Sogama reactiva a contratación cun investimento de máis de 5,1 millóns para melloras no complexo medioambiental

CERCEDA | Tralo obrigado parón nos procedementos administrativos como consecuencia da crise sanitaria do COVID-19, Sogama reactiva, cun investimento de máis de 5,1 millóns de euros, a contratación de obras e servizos a fin de acometer diversas melloras no Complexo Medioambiental de Cerceda (A Coruña). 

Entre as mesmas, cabe reseñar a ampliación do depósito controlado de cinzas, cun importe de licitación de 2.783096,32 euros. Neste sentido, é preciso recordar que Sogama somete a valorización enerxética, a temperaturas superiores a 850º e utilizando os sistemas de depuración de gases máis innovadores e vangardistas, a fracción non reciclable dos residuos urbanos, resultando deste proceso dous produtos finais:  escouras (inertes) e cinzas. As primeiras entréganse a xestor autorizado e assegundas son introducidas en sacos big-bag, herméticamente pechados, para ser ubicadas nun depósito que cumpre con todos os requisitos ambientais e as máximas garantías de seguridade.  

A obra a acometer está suxeita aos requisitos da Autorización Ambiental Integrada, destacando o potente sistema de impermeabilización do fondo do vaso,  dotado de varias capas conformadas polos seguintes elementos: xeocomposto bentonítico de 5.000 g/m2, diversas láminas de PEAD de 2 mm de espesor lisa, xeocomposto drenante constituído por unha xeomalla drenante de PEAD e lámina de xeotéxtil non tecido de 120 g/m2, ademais dunha capa de 50 cm de grava drenante 15/30 mm e cunha condutividade hidráulica superior a 10-4 m/s.  


Sistemas de depuración automáticos e máis eficientes

Así mesmo, a compañía procederá á automatización e optimización do funcionamento das depuradoras do Complexo a fin de facelas máis eficientes. Cunha contía de 164.868,55 euros, esta licitación comprende a actualización do hardware de control automático, así como o deseño, programación, instalación e posta en marcha dun novo software de control SCADA. 


Novo edificio de servizos con prestacións reforzadas

Tamén sacará a concurso, por 2.158.673,26 euros, a obra do novo edificio de servizos coa pretensión de seguir mellorando as condicións laborais dos traballadores e que estes dispoñan dos medios axeitados para levar a cabo o seu labor coas maiores garantías de hixiene, seguridade e salubridade.  O novo edificio albergará vestiarios, zona de descanso, comedor, sala de formación, así como a área de enfermería.  Adicionalmente, incluirase a instalación dun sistema de carga de vehículos eléctricos no parking do complexo. 

A contratación esixe a dotación, en réxime de aluguer, de módulos provisionais para que, durante o período de execución da obra, os operarios sigan contando coas mesmas prestacións. As licitacións correspondentes á ampliación do depósito controlado de cinzas, así como a obra do novo edificio de servizos, xa están publicada na plataforma SILEX da Xunta de Galicia. Departamento de comunicación