GALICIA | SOGAMA
Sogama retoma a xestión de residuos sanitarios de baixo risco
Correspondentes a segunda onda do COVID-19.
CERCEDA | A
petición do SERGAS (Servizo Galego de Saúde), e coa autorización
administrativa da Consellería de Medio Ambiente, Territorio e Vivenda,
Sogama retoma a xestión de residuos sanitarios de baixo risco (buzos,
luvas, máscaras desbotables e asimilables) no marco da segunda onda do
COVID-19.
Os
residuos sanitarios volveron a crecer de forma exponencial desde o
pasado mes de outubro e a Sociedade Galega do Medio Ambiente, na súa
condición de empresa pública autonómica, reactivou a súa operativa para
darlles un correcto tratamento, conforme ás instrucións ditada polo
Ministerio de Sanidade e o Ministerio de Transición Ecolóxica, nas que
se dá prioridade á valorización enerxética fronte ao vertedoiro debido
ao negativo impacto deste último sobre o medio ambiente e a saúde.
Mesmo protocolo que na primeira onda
Así
as cousas, Sogama habilitou de novo, no Complexo Medioambiental de
Cerceda (A Coruña), unha planta, provisional e específica, que xa
estivera en funcionamento durante a primeira onda da pandemia, e onde
este tipo de residuos procedentes de centros adscritos ao SERGAS reciben
un pretratamento (trituración e acondicionamento en forma de
combustible CDR) para alimentar posteriormente as caldeiras da Planta
Termoeléctrica e ser valorizados enerxeticamente a máis de 850ºC,
temperatura coa que se garante a eliminación de patóxenos e outros
axentes nocivos. Desde
os centros sanitarios de orixe, estes refugallos trasládanse a Cerceda
en bolsas pechadas que, á súa vez, son introducidas en caixas de cartón
precintadas e embaladas, para ser transportadas nas mellores condicións
hixiénicas e de seguridade.
Sogama
seguirá o mesmo protocolo que instaurou o pasado mes de abril. Neste
sentido, cabe recordar que, entre o 21 de abril e o 21 de maio, tratou
no seu complexo industrial 65.000 quilos. Para isto contratou persoal
externo, que se rexeu por horarios diferentes aos traballadores
adscritos á xestión de residuos urbanos, contando igualmente con
vestiarios e áreas de descanso independentes a fin de previr posibles
contaxios. A
estimación é que, a partir deste momento, a entidade xestione nas súas
instalacións da orde de 5,12 toneladas diarias de residuos sanitarios de
baixo risco.
O
presidente da compañía, Javier Domínguez, que hoxe supervisou
personalmente o funcionamento da planta reactivada para tal fin,
manifestou que Sogama colaborará ao máximo para que estes residuos
reciban o mellor tratamento posible. Tal e como sinalou, “non podemos
permitir que unha ineficiente xestión destes refugallos orixine un novo
problema ambiental e de saúde pública”. Indicou
que as plantas de valorización enerxética que dan servizo a varias
comunidades españolas están a levar a cabo este labor a fin de evitar o
vertido destes residuos, importante fonte de contaminación. Departamento de comunicación