POLÍTICA | BNG
O BNG reclama "información clara" sobre as consecuencias da falta de acordo do Brexit
BRUXELAS | A portavoz do BNG en Europa, Ana Miranda, e a portavoz nacional, Ana
Pontón, demandan “información clara” sobre a situación na que quedarían
os galegos e galegas residentes en Irlanda e Gran Bretaña en caso de
que este domingo non se produza un acordo sobre o Brexit. “É fundamental
garantir os dereitos da cidadanía galega emigrada, xa que pode verse
moi afectada pola falta de acordo entre Reino Unido e Bruxelas”,
subliñan.
A vixencia da tarxeta sanitaria europea; os
recoñecementos de diferentes prestacións -incapacidade, maternidade,
paternidade, xubilación-; a preocupación polo retorno e as posibilidades
de reinserción na sociedade galega; os futuros programas de intercambio
entre universidades; e a fenda dixital constitúen as principais
inquedanzas das galegas emigradas a Reino Unido e Irlanda, segundo lles
trasladaron nun encontro virtual mantido con Ana Pontón e Ana Miranda,
organizado pola asemblea do BNG nas Illas Británicas.
Datos actualizados da emigración
“O
PP fala de fuga de cerebros, pero estamos diante dunha emigración pura e
dura que se foi por motivos laborais e económicos porque en Galiza non
atoparon oportunidades para desenvolver o seu proxecto vital”,
denunciaron Pontón e Miranda, quen defenden a necesidade de realizar
unha casación de datos actualizados da emigración galega en Europa, e en
concreto no Reino Unido, xa que os datos do CERA non son fiables e non
serven para identificar cantos galegos hai emigrados”.
Co
obxectivo de facer un seguimento destas cuestións, Ana Pontón anunciou
que, en canto a situación de pandemia o permita, viaxará a Londres para
manter un encontro coa colectividade galega emigrada a Gran Bretaña e
trasladarlles as iniciativas que se presenten no Parlamento Galego ao
respecto.
“Nós non somos Boris Johnson nin Feijóo, e queremos transparencia
sobre as repercusións do Brexit porque estamos preocupadas por como
afectan as decisións sobre o Brexit ás galegas que se viron obrigadas a
emigrar e que viven nunha situación de tremenda incertidume”, concluíu
Ana Miranda, quen na súa intervención lembrou asemade as diversas
iniciativas presentadas polo BNG na Eurocámara sobre as consecuencias do Brexit sobre as condicións de vida da cidadanía comunitaria
desprazada a Reino Unido, senón tamén sobre a pesca e diversos sectores
económicos como o téxtil. Departamento de comunicación