GALICIA | LETRAS GALEGAS 2021
A Real Academia Galega dedicaralle as Letras Galegas 2021 a Xela Arias
A Real Academia Galega dedicaralle a Xela Arias (Sarria, 1962 – Vigo,
2003) o Día das Letras Galegas de 2021. O Pleno da institución acordou
na sesión celebrada hoxe homenaxear o ano que vén a quen foi unha
das voces máis destacadas da poesía galega contemporánea. Xela Arias é
autora dunha poesía singular, transgresora, sincera e comprometida que
será celebrada ao longo dun 2021 durante o cal a RAG lembrará ademais o
seu labor como editora e tradutora que verteu milleiros de páxinas de
clásicos universais ao galego.
Por idade, Xela Arias formou parte dun grupo de poetas que tamén
recibirán a homenaxe da RAG a través dela: o dos mozos e mozas que
renovaron a poesía a partir dos primeiros 80 en temas, estilo e forma.
Pero a dela é unha desas voces singulares e inclasificables, de tal
maneira que —en palabras de Ana Romaní— o seu é un nome que se pronuncia
sen xeración.
A protagonista das Letras Galegas 2021 concibía a
poesía como un xeito de indagar e cuestionar a orde das cousas, de
describir o que se aprende a ocultar. A pescuda do eu fonda e reflexiva,
a afirmación do corpo feminino, a perspectiva de xénero e a procura de
novos espazos para a poesía mediante a recitación ou o diálogo coa
fotografía, a música e a pintura, son algúns dos trazos destacados da
súa voz como creadora, que anticipou nos anos 80 do século pasado moitos
temas e características formais da poesía galega da década seguinte. Ler máis