A CORUÑA | PORTO EXTERIOR
O BNG reclama a licitación "inmediata" da conexión ferroviaria co porto exterior da Coruña
SANTIAGO DE COMPOSTELA | O deputado do
BNG no Congreso, Néstor Rego, demanda a licitación urxente das obras para a
conexión ferroviaria co porto exterior da cidade da Coruña en Punta Langosteira.
Así mesmo, a formación nacionalista reclama a transformación dos terreos
liberados no porto interior para uso público como compensación pola débeda
xerada na construción do porto exterior.
Nos Orzamentos Xerais do Estado
non aparecen recollidas partidas específicas para as obras da conexión co porto
exterior da Coruña, razón pola que Rego lembrou que o BNG presentara unha
emenda para dotar dunha partida específica de 20 millóns de euros que,
infelizmente, foi rexeitada polos partidos do goberno. A formación nacionalista
sinala que, a pesar disto, o Ministerio de Transporte conta cos recursos
necesarios para levar a cabo esta licitación “empregando partidas xenéricas ou
facendo uso dos fondos europeos de recuperación”.
“A conexión ferroviaria co porto
exterior da Coruña en Punta Langosteira é vital para garantir a plena
operatividade desta infraestrutura e para asegurar a conexión co corredor
atlántico e as redes europeas de mercadorías” salientou o deputado do BNG no
Congreso. Así mesmo, lembrou que nos últimos anos “non se deron os pasos
efectivos” para acometer esta actuación “a pesar da existencia do proxecto” e
alertou sobre a caducidade do estudo de impacto ambiental das obras en xuño de
2021. “Permitir a caducidade do informe de avaliación ambiental suporía un
retraso de varios anos na execución das obras e iso é algo que A Coruña e
Galiza non se poden permitir” denunciou o deputado nacionalista.
Así mesmo, Rego enfatizou que o
“Estado está moral e politicamente obrigado a compensar a débeda de 200 millóns
de euros xerada pola construción do porto exterior, se non quere caer nun
agravio comparativo evidente co noso País”, en referencia á condonación da
débeda de 400 millóns do porto exterior de Valencia. O deputado nacionalista reclamou
que a compensación se realizase coa dotación de partidas específicas necesarias
para a transformación dos espazos liberados no porto interior da cidade para o
uso público. Departamento de comunicación