GALICIA | SERVIZO DE AXUDA NO FOGAR

O BNG denuncia na Comisión Europea a precariedade laboral no Servizo de Axuda no Fogar

A CORUÑA | A portavoz do BNG en Europa, Ana Miranda, xunto a  concelleira do Bloque na Coruña, Avia Veira, e a representante da Plataforma SAF GALIZA, Trinidad Palacios, presentou a denuncia que se vai trasladar á Comisión de Peticións da Eurocámara sobre a precariedade laboral do servizo de atención domiciliaria de persoas en situación de dependencia. “Demandamos que a Comisión Europea abra unha investigación que impulse a protección da saúde e a hixiene das traballadoras, nunha profesión tan invisibilizada, a calidade na prestación dos servizos e a fin da precariedade”, subliñou Ana Miranda.

Segundo destacou a portavoz do BNG en Europa, “existe un claro e sistemático incumprimento da normativa europea, agravado durante a pandemia”, sobre todo a respecto do Pilar Europeo de Dereitos Sociais, no seu capítulo “Condicións de traballo xustas”; a Resolución do Parlamento Europeo, de 4 de xullo de 2017, sobre as condicións laborais e o emprego precario; a Resolución do PE, de 31 de maio de 2018, sobre a resposta ás peticións sobre a loita contra a precariedade e o uso abusivo dos contratos de traballo de duración determinada; e a Resolución do PE, de 10 de febreiro de 2021, sobre la redución das desigualdades, con especial atención á pobreza dos traballadores. 

“Estas Resolucións alertan do aumento da pobreza entre as persoas traballadoras e instan a poñer fin a situación denunciadas en diversas ocasións polas traballadoras do Servizo de Axuda no Fogar”, explicou Ana Miranda na súa comparecencia, na que tamén participou a concelleira do BNG na Coruña, Avia Veira. Neste sentido, Veira destacou que a atención a domicilio “é un servizo social imprescindible, pero moitas veces invisible tanto para o goberno galego como estatal, ao tratarse dun servicio altamente feminizado, xa que o 97% das traballadoras son mulleres”, e agradeceu o traballo desenvolvido por Ana Miranda en Europa.  


Falta de medidas de protección 

Na actual situación de pandemia a situación no SAF agravouse, xa que aínda que os gobernos español e galego o declararon servizo esencial, foi considerado de baixo risco na primeira vaga. “Isto tivo unha gravísima consecuencia para a saúde de usuarios e traballadoras que nos atopamos na primeira liña de coidados directos, debido á enorme exposición ao contaxio por Covid19”, apuntou Trinidad Palacios, quen ao respecto criticou a falta de medidas de protección suficientes para evitar os contaxios e a propagación do coronavirus.

Segundo indicou esta falta de medios súmanse ao resto de problemas que vive o colectivo no desenvolvemento do seu traballo, como as agresións físicas e sexuais, a ausencia de consideración de enfermidades profesionais e a falta de criterios homoxéneos para tratar estas cuestións, entre outros. Todos estes aspectos son recollidos na denuncia que tratará a Comisión de Peticións. 

Por outro lado, a portavoz da Plataforma SAF GALIZA, denunciou que, pese a que os datos demostran que as traballadoras do Servizo de Axuda no Fogar son o segundo colectivo máis afectado pola pandemia, só por debaixo dos sanitarios de primeira liña, “no plan de vacinación estamos relegadas ao cuarto grupo”. A esta situación súmase a falta de transparencia na comunicación dos casos de contaxios e posibles contaxios, “de forma que é terriblemente difícil  prever a propagación e corrixir as posibles causas dos contaxios”. 

“Consideramos imprescindible que a Comisión de Peticións inste ao Estado español a asimilar as traballadoras de asistencia a domicilio cos profesionais sanitarios, xa que de ser considerado un servicio esencial e de alto risco terían garantidos outro tipo de proteccións laborais e preventivas”, concluíu Ana Miranda. Departamento de comunicación