8M | BNG
Pontón: "A resposta dos Gobernos foi e está sendo a da precariedade das mulleres"
SANTIAGO DE COMPOSTELA | A portavoz nacional, Ana Pontón, advirte da “involución”
dos dereitos e condicións laborais das mulleres ante un 8M que “ten máis
sentido ca nunca” nun momento no que a resposta económica á pandemia pretende
asentarse “sobre a precariedade das mulleres”. Así o manifestou nun acto con
mulleres que desenvolven a súa actividade en distintos ámbitos profesionais e
co que o BNG rendeu homenaxe “a todas as mulleres que foron, e seguen sendo, imprescindibles”
durante a crise orixinada pola COVID.
As
caixeiras de supermercados, as médicas, as empregadas de residencias, as
enfermeiras, as mestras e tantas e tantas outras mulleres “foron as que, desde
os seus postos de traballo sostiveron ao conxunto da sociedade no peor da crise”,
lembrou, para a continuación denunciar que, sen embargo, “un ano despois as
súas condicións laborais, económicas e sociais non só non melloraron, senón que
en moitos casos empeoraron”.
Neste
sentido criticou que fronte ao “imprescindible” labor desenvolvido, a resposta
dos Gobernos foi e está sendo a da “precariedade das mulleres” e recordou que 8
de cada 10 empregos destruídos dende a chegada do virus estaban ocupados por
mulleres. “A pandemia non pode ser unha coartada para conxelar ou retroceder
nos dereitos conquistados”, recalcou, logo de reprobar “a campaña orquestrada
dende a dereita e a extrema dereita” para cuestionar o “noso dereito a
manifestarnos e defender nas rúas a igualdade real”.
Pontón
recordou as innumerables manifestacións desenvolvidas anteriormente por
distintos colectivos sociais e que non foron cuestionadas en ningún momento,
polo que considerou indignante o relato que se pretende impoñer sobre o 8M “sabendo
que non vai haber mobilizacións masivas, senón actos reivindicativos que
cumpren todas as medidas de seguridade”.
“Sairemos
a manifestarnos con toda a responsabilidade e mantendo todas e cada unha das
medidas de seguridade, pero non imos a deixar de reivindicar dereitos porque o
machismo político pretenda calarnos e deixarnos na casa”, incidiu, logo de recriminar
o intento de “criminalización” das mulleres e o feminismo, e lamentar que o
escenario debuxado pola dereita lle estea marcando o paso a unha parte da
esquerda. “Que non conten co BNG para isto”, acentuou.
A
portavoz nacional asegurou que as mulleres e o feminismo galego “teñen a un
aliado” no Bloque, en contraposición á inacción do Executivo de Feixóo en
materia de igualdade que “en vez de poñerse do lado das mulleres, decidiu
boicotear o 8M”. Logo de reprochar ao PP que non impulsara nin unha soa medida
en favor das mulleres, recordou os retrocesos rexistrados en distintos ámbitos,
con recortes nas axudas ás mulleres vítimas de xénero e nos servizos de
información ás mulleres, a recuperación dos concertos que segregan por xénero e
o incumprimento das leis de igualdade.
“Boicotean
os dereitos das mulleres como veñen facendo coas folgas do 8M”, subliñou, para
a continuación recordar que o PP chegou a considerar machista a primeira folga
de mulleres e que a Administración Feixóo ten dúas sentenzas condenatorias por
vulnerar o dereito á folga dunha xornalista da TVG e por impoñer uns servizos
mínimos que segundo sentenza xudicial eran “maliciosos” e pretendían boicotear
a folga. “Este é o balanzo do PP: boicot ás mulleres e á igualdade”, resumiu.
Fronte
ao modelo do boicot e o recorte, Pontón apuntou a proposta do BNG en materia de
igualdade e que, segundo subliñou, defenderá non só o 8M senón todos e cada un
dos días do ano. Neste sentido, avogou polo desenvolvemento dun plan de emprego
feminino, que evite que as mulleres saian expulsadas do mercado laboral e que
acabe coa precariedade, e polo impulso dunha Lei galega pola igualdade salarial
para poñer fin a unha fenda pola que unha muller cobra de media un 21% menos de
salario que un home por facer o mesmo traballo.
Co
obxectivo de combater calquera tipo de discriminación, e tal e como acontece en
Euskadi ou nos países nórdicos, propuxo a creación dunha Valedoría de Igualdade
con capacidade sancionadora e, de igual xeito, defendeu a posta en marcha dun
Plan de Dignificación dos Coidados cunha rede pública de servizos que facilite
a conciliación. Por último, apostou por destinar o 1% dos orzamentos da Xunta á
loita contra a violencia machista. “Sei que queda moito camiño por andar, pero
tendes a miña palabra que dende o BNG imos defender a igualdade das mulleres e combater
a discriminación nunha campaña que non empece e acabe no 8M senón que imos
desenvolver todos e cada un dos días do ano”, concluíu. Departamento de comunicación