EVELB

Evelb desenvolve a nova app do Concello de Cangas

Xa está dispoñible para a súa descarga.

SANTIAGO DE COMPOSTELA | Xa está operativa a aplicación para dispositivos móbiles do  Concello de Cangas creada pola empresa tecnolóxica evelb -con sede en Santiago de Compostela-, un proxecto que a entidade pontevedresa tiña como prioritario dentro da súa estratexia de dixitalización. Esta app evolucionará adaptándose ás necesidades que vaian xurdindo aos usuarios no tempo. 

A  app, dispoñible tanto para  iOS como Android, conta cun deseño sinxelo no que as seccións están perfectamente diferenciadas por categorías e cores, dando resposta deste xeito á demanda de crear un produto que favoreza “a transparencia e accesibilidade directa aos veciños, ao mesmo tempo que nos permite dar a coñecer o municipio en todos os seus puntos e axiliza a detección de incidencias que temos que solucionar”, tal e como detalla Victoria Portas, alcaldesa de Cangas. 
 
A nova  app do  Concello de Cangas é o complemento e reflexo perfecto da súa páxina web, pois mantívose tanto a mesma estrutura como a posibilidade de acceder a todos os trámites e servizos dos que dispón o Concello no seu portal virtual. Deste xeito, pódese consultar desde calquera smartphone ou tablet no que se descargue a app información sobre turismo, cultura, axenda, actualidade, incidencias, servizos á veciñanza, pleno municipal, as redes sociais do organismo público e as distintas áreas representativas das concellerías.

“A idea de crear esta aplicación xorde porque cremos que é unha forma máis práctica de que a veciñanza acceda a toda a información relativa ao Concello de Cangas, ademais de ser un recurso útil en canto a turismo. Cangas é un municipio moi turístico e cremos que é un sector importante que hai que explotar doutro xeito. Con esta app poñemos ao dispor de calquera persoa un mecanismo sinxelo, totalmente optimizado, para visitar o noso municipio de forma áxil”, explica Victoria Portas. 

“Todo o equipo de Desenvolvemento de evelb implicouse desde o minuto uno nun proxecto tan importante para a empresa coma este. Conseguimos crear unha app fácil de actualizar para o Concello de Cangas e, ao mesmo tempo, intuitiva e apetecible para o usuario final”, declara Julio Nimo, responsable do departamento de Desenvolvemento de evelb.


Axilizar a xestión de incidencias 

Outro dos aspectos clave da nova app do Concello de Cangas é o apartado de xestión de incidencias. Do mesmo xeito que na páxina web da entidade canguesa, nela tamén está integrada EMERXIA, unha plataforma creada por evelb e deseñada para facilitar a comunicación de incidencias ou suxerencias entre a cidadanía e os concellos. Mediante un sinxelo formulario e utilizando ferramentas como a xeolocalización e o envío de fotografías, toda a veciñanza e os visitantes poden notificar ás oficinas municipais a través da app calquera dano, suxerencia ou problema de todo tipo.

“EMERXIA está a funcionar realmente ben na web e os e as cidadás están a responder con ela. Agora, estando tamén dispoñible dentro da app, cremos que será máis práctico aínda e que isto permitirá unha maior axilidade na xestión”, afirma a rexedora.

“evelb creou EMERXIA en 2017 co propósito de responder a unha necesidade latente como era a de resolver incidencias en concellos de forma áxil e co menor esforzo posible e lográmolo, pois EMERXIA non require da instalación de apps adicionais ou de rexistro. Desde a súa posta en marcha en distintas entidades públicas a resposta positiva dos cidadáns daqueles concellos que a utilizan superou mesmo as nosas expectativas”, manifesta Julio Nimo, responsable do departamento de Desenvolvemento de evelb. Departamento de comunicación